Наргиз Гюлечова
Декабрин аьхиримжи йигъари Дагъустан Республикайиъ айи Росгвардияйин Управлениейин начальникдин вазифйир вахтназди тамам апIурайи полковник Антон Зуевдихъди 2024-пи йисандин натижйириз бахш дапIнайи пресс-конференция гъабхьну.
Конференция ккебгъри, Антон Зуевди, республикайин Росгвардияйин Управлениейин подразделенйири гьял гъапIу вазифйириканра гъапну. Дугъан гафариинди, йисандин арайиъ Управлениейин гъуллугъчйири 3000-тIан артухъ улихь дивнайи вазифйир гьял гъапIну.
«2024-пи йисандин арайиъ Управлениейин гъуллугъчйири, культурайин серенжемариъ иштирак шули, жямяаьтлугъ хатIасузвал тямин апIувалиан чпин улихь дивнайи 1900-тIан артухъ вазифйир тамам гъапIну. Гьадрарин арайиъ спортдин, диндин, Ватандин Аьхю дявдин Гъалибвалин 79 йисахъди аьлакьалу вуйи ва гьацира Урусатдин Президент ктагъбан сечкйирин серенжемарра а.
Мидланра гъайри, республикайин МВД-йихъди сатIиди терроризмдиз аькьси вуйи серенжемарра кIули гъахури, 1400-тIан артухъ месэлйир гьял гъапIну», – гъапнийи Антон Зуевди.
Улхуб давам апIури, Росгвардияйин Управлениейин начальникдин вазифйир вахтназди тамам апIурайирин гафариинди, РД-йиъ айи Урусатдин ФСБ-йин сяргьятар уьрхру Управлениейихъди ва хъанара жара ведомствйирихъди сатIиди, Каспий гьюликкан ва Терекна Сулак нирариккан къанунсузди балгъар ккадагъурайи касар дисбакан ва душварин къайда уьбхбан серенжемарра гъахбакан гъапнийи. Му ляхнар кIули гъахбан натижайиъ 19 кас гъидисну, 800 касдиина административ дело гъитIибккну ва къанунсусди ккадагъу 11 тоннайин балгъар тадагъну.
Пресс-конференцияйиъ Антон Зуевди 2024-пи йисан ужуди гъуллугъ тамам гъапIу Управлениейин гъуллугъчйириканра гъапнийи. Дугъу мялум гъапIганси, ккудубшу йисан юкIв хъади ва заан ери ади гъуллугъ тамам апIбаз лигну, Управлениейин 798 кас лишанлу дапIна. Гьадрарикан 43 гъуллугъчийиз гьюкуматдин терефнаан наградйир тувна, гьяйифки, сариз — йикIбан кьяляхъ.
Антон Зуевди ватанпервервалин гьякьнаанра Управлениейи гъабхурайи ляхникан гъапнийи. Дугъан гафариинди, гъи хусуси метлеб айи дявдин операция гъябгъюрайивалиан гьюкуматдин аьгьвалат читинуб вуйивализ лигну, аргъаж шулайи наслар ватанпервервалиинди тербияламиш апIуб себеб вуди, му ляхин сабпи нубатнаъди гьял дапIну ккуниб ву.
«Росгвардияйин Дагъустандин Управлениейин кулиъ айи генерал-майор Александр Ореховдин жягьтлувалиинди, региондин образованиейин идарйириъ Росгвардияйин хиликк ккайи 14 хусуси классар тешкил дапIна. Душвариъси, жара мектебариъра, ватанперверваликан аьгъювалар артухъдиси туври, кьягьялваликан вуйи дарсар кивра, экскурсйир ва жюрбежюр спортдин серенжемар гъахура.
Мидланра гъайри, Росгвардияйин Управлениейин жигьил гъуллугъчйир ватанпервервалиинди тербияламиш апIуб себеб вуди, ккудубшу йисан Управлениейин подразделенйирин гъуллугъчйир, ведомствойи кIули гъузу вари Урусатдин дережайинси, региондинра 44 акцияйиъ иштирак гъахьну», – аьлава гъапIнийи полковник Антон Зуевди.
