2020-пи йисан 15-пи февралиъ Табасаран райондин Хючна гъулаъ айи «Хучни» кIуру алвер апIру центрин 3-пи мертебайиъ ерлешмиш дубхьнайи кафейиъ Афгъанистандин дявдин иштиракчйирихъди серенжем кIули гъубшну.
Серенжем ачмиш апIури, Табасаран райондин администрацияйин, культурайин, спортдин, туризмдин ва жигьиларин политикайин отделин начальник Аьбдулвагьаб Аьбдуловди жикъиди думу дявдиъ гъахьи гьядисйирикан ктибтнийи.
Табасаран райондин глава Мягьямед Къурбановди эскрар-интернационалистар Афгъан дявдин иштракчйир кIваин апIру Йигъахъди тебрик гъапIнийи. Дугъу чан улхбаъ гьамци гъапнийи: «Гьюрматлу Афгъан дявдин ва жара бицIи дявйирин иштиракчйир! Гъи ватан бадали дявдиъ иштирак гъахьидар кIваин апIурахьа. Гьадрарин жергйириъ Табасаран райондиан вуйи эскрарра ади гъахьну. Ихь эскрари чпи Ватандин Аьхю дявдиъ фашизмдиин гъалиб гъахьи абйирин игитвализ лайикьлу вуйивал улупну. Ихь юкIвариъ думу гьунар гьаргандиз гъубзди. Узуз Ватандин улихь чпин буржи тамам дапIну кьяляхъ гъафидариз чухсагъул пуз ккундузуз. Учву гъира учвухъ хъайи буржи, жигьилариз аькьюл туври, тамам апIурачва, жюрбежюр месэлйир гьял апIбаъ кюмекчйир вучва. Узу учвуз жандин сагъ’вал, ичв хизанаризра, учвузра ичв уьмриъ архаинвал ккун апIураза», — гъапнийи М.Къурбановди.
Чан удучIвну улхбаъ РД-йин военный комиссариатдин Табасаран райондиъ айи отделин начальникдин заместителди лихурайи Надир Шихягьмедовди гьамци гъапнийи:
«Табасаран райондиан Афгъанистандиъ гъубшу дявдиъ 78 бай иштирак гъахьну, дурарикан 2 йивну гъийихну, 1 кас гъудургну. Дурарикан гизафсдар гьюкуматдин заан наградйирихъди лишанлу дапIна. Думу дявдиъ ихь уьлкейиан 15 агъзур кас гъийихну. Ухьу дурариз икрам апIурахьа. УрчIвуд йисан кIули гъубшу думу дявдиъ 118 самолёт, 333 вертолёт, 147 танк, 1314 БМП, БТР, БМД, БРДМ, 433 миномёт, 1138 аьдад радиостанцйир ва штабдин машинар, 510 инженервалин машин, 11369 бортар али машинар ва автоцистернйир чIур гъахьну. Дявдин женгар кIули гъягъру йишвариъ пулин дакьатарин харжарра цIиб шулдар. Гьаци, пишекрари къайд апIурайиганси, Афгъанистандиъ мялум дарапIу дявдиз ихь гьюкуматди 1978-пи йислан 1990-пи йисаз 40 миллиард доллар харж гъапIну. Анжагъ Афгъанистандиъ ерлешмиш дубхьнайи 40-пи армия уьбхюз ихь уьлкейи гьар йисан 7,5 миллиард манат харж апIури гъахьну».
Серенжемдиъ удучIвну гъулхну Афгъан дявдин иштиракчи Рафик Касимовра саб-кьюб гаф гъапнийи: «Думу дявдиъ улупу гьунарариз лигну, ихь хайлин эскрар заан наградйирихъди лишанлу гъапIну. 200 агъзуртIан артухъ эскрар (гьадму гьисабнаан 11 агъзур эскрар дявдин женгариъ гъийиху), орденарихъди ва медаларихъди, 86 кас Советарин Союздин Игит ччвурнахъди (28 кас йикIбан кьяляхъ) лишанлу гъапIну. Лишанлу гъапIдарин арайиъ 110 агъзур эскер ва сержант, 20 агъзурихьна прапорщик, 65 агъзур офицер ва генерал, 2,5 агъзур эскервалин гъуллугъ тамам апIурайидар, гьадму гьисабнаан 1350 дишагьли а».
Серенжемдиъ гьацира райсобраниейин председатель Аьлимягьямед Къазиев, ЦРБ-йин главврач Абсередин Мирзабегов, райондин ветеранарин Советдин председатель Мягьямед Ражабов, Табасаран райондин федералин судья Гюляли Шихгереев удучIвну гъулхнийи.
Дурари чпин улхбариъ Афгъанистандиъ кIули гъубшу мялум дарапIу дяви ихь уьлкейиз лап багьади дийибгъуваликан гъапнийи ва гележегдиъ ихь эскрариз саб дявдиъра, иллагьки гъурабатдиъ кIули гъягъру дявйириъ, иштирак хьувал кьисмат дархьувал ккун гъапIнийи.
Табасаран райондин культурайин Хулан артистар Бесханум Гюлмягьямедовайи, Оксана Ибрагьимовайи, Низакет Аьбдуселимовайи, Рустам Рамазановди, Закарья Амирбеговди дявдикан вуйи мяълийир гъапIнийи. Лезиз Мусаевди гитарайихъди гъапIу «Офицерар» кIуру мяъли уч духьнайидариз лапра кьабул гъабхьнийи. Юноармейцйири дявдин вахтарикан вуйи шиърарра гъурхнийи. Уч духьнайидар тешкил гъапIу серенжемдикан гизаф рази гъахьнийи.
