Мейлан Нежефов
Урусатдин вари шагьрар-районариъ ихь ватанагьлийири, баркаллу зегьмет зигури, халкьдин кьимат за апIбак чпин хусуси пай кивра. Гьацдар касарикан сар гъийин йиз макьалайин игит Эсмира Гьяжимягьямедовара ву.
Эсмира 1995-пи йисан 15-пи майдиъ Хив райондин ЦIудухъ гъулаъ Серкер ва Бесхалум Гьясановарин аьхю хизандиъ бабкан гъахьну. Багъри гъулан мектебдин 9-пи класс ккудубкIбалан кьяляхъ Эсмира 2011-пи йисан Дербент шагьрин педколледждик урхуз кучIвру. 2015-пи йисан урхуб ккудубкIу жигьил шуру чан уьмур чпин гъулан бай Арвид Гьяжимягьямедовдихъди ккабалгуру. Думугандиз Арвид чан абйир-бабарихъди гъул’ан Ивановский областдин Наволоки шагьриз кючюрмиш духьну къад йистIан артухъ вуйи.
2016-пи йисхъанмина Эсмира Наволоки шагьрин 1-пи нумрайин бицIидарин багъдиъ тербиячиди, гьаддихъди сабси шагьриъ ментальный арифметикайин тренердира лихура. Душваъ дугъахь аьгъювалар гъадагъурайи баяр-шубари олимпиадйириан ва жюрбежюр жара серенжемариан гъалибвалин ва пешкешнан йишвар гъадагъури шулу.
Аьгъювалар гъадагъуз гьич саб вахтнара кьан дар кIуруганси, Эсмирайи гьамусяаьт Р. Гьямзатовдин ччвурнахъ хъайи ДГПУ-йин дагъустан филологияйин факультетдин 3-пи курснаъ заочно урхура. Дугъу чан уьмрин юлдаш Арвиддихъди кьюр риш – Ханум ва Ясмин тербияламиш апIура.
Улихьна йигъари муниципалитетдиъ «Наволоки: накь, гъи ва закур» кIуру серенжемдиъ Эсмирара иштирак гъахьнийи. Душваъ дугъу «Ихьдар гатIахьидархьа» кIуру темайиан, эскрариз сенграриъ кархьру шамар ва яракьар жин апIру чулар фици гьязур апIуруш, мастер-класс улупнийи.
«ЮкIв ляхниин машгъул вуйиган, удудукьруб фукIара адар. Узуз, шамар гьязур апIбан бадали, туканариъ харар, гьяжибугъда ади шлу рукьан кьутйир ва картондин ишкIар лазим гъахьунзуз. ИчIи кьутйир сифте дижикIну, марцц дапIну, хъасин дурариъ картон ивну ва ихь аьдати шамар дурхьну, дурариъ урзунза. Му жюрейин шамар сенграриъ 5-6 сяаьтна кархьну гъузру. Дидин манишнахь ихь игитари окопариъ чпин жанар аргуру ва ипIруб мани апIуру. Йизра гъахи гъардаш миллетчйирихъди дявдиъ айиз. Я Рабби, жил’ин ислягьвал ибшри. Ухьуз гьубкIри адруб гьадму ву», – гъапнийи ич сюгьбатнан аьхириъ Эсмира Гьясановайи.
