Умгьанат Сулейманова
Гъубшу йисан 2-пи ноябри Мягьячгъалайиъ Дуствалин хулаъ Урусатдин халкьарин сабвалин машквран улихь Дагъустан республикайин глава Сергей Меликовди Дербент шагьрин ЦГБ-йин дишагьлийирин консультацияйин заведующий Заира Курабеговайиз «Дагъустан республикайин лайикьлу духтир» ччвур тувну. Думу жюрбежюр гьюрматнан грамотйирин, пешкешарин сагьибра ву.
Заира Курабегова 1984-пи йисан Дербент шагьриъ бабкан гъахьну. 2001-пи йисан шагьрин 4-пи нумрайин мектеб гъизилин медализ ккудубкIну, думу Дагъустандин гьюкуматдин медицинайин университетдин сагъламвалин факультетдик урхуз кучIвру. Университет уьру дипломдиз ккудубкIу жигьил пишекри, 2007-2008-пи йисари, Дербент шагьрин ЦГБ-йиъ интернатурайиъ урхури, чав гъадагъу теорияйин аьгъювалар практикайиъ мюгькам апIури гъахьну. Хъа интернатура ккудубкIбан кьяляхъ, дугъу шубуд йисанкьан дишагьлийирин консультацияйиъ участковый гинекологди ляхин апIуру. Ляхнин вазифйир лазим вуйи къайдайиинди тамам апIувализ лигну, Заира Курабеговайи ЦГБ-йиъ дишагьлийирин консультацияйин заведующийди тяйин апIуру ва гъийин йигъазкьан дугъу душваъ ляхин апIура.
– Духтрин ляхин пак вуйи, марцци, рягьимлу ляхин ву, – кIура Заира Курабеговайи.
БицIир гьарсар абайин ва бабан уьмрин шадвал, хизандин давам ва гележег ву. Амма, гьяйифки, бицIидар дюн’яйиз гъахи шадвал рябкъюз гьарсар дишагьлийиз кьисмат шуладар.
– Гъийин деврин медицинайин кюмекниинди аба-бабвалин шадвал рябкъюз мумкинвал гъабхьи, хулаъ бицIидарин шаду сесер атIагу хизанар гизаф а.
Дагъустандиъ бицIидар адарди ОМС-дин кюмекниинди бицIидар хпан бадали ЭКО-йин процедура апIуз мумкинвал гъабхьи хизанарин кьадар артухъ шула. Урусатдин жара йишвариъси, ихь республикайиъра, гъирагъдиз дурушди, медицинайин кюмекниинди думу месэла гьял апIуз аьхю мумкинвалар духьна. Аьхиримжи вахтна ич больницайиъра цIийи медицинайин техникайихъди тямин апIбан хайлин месэлйир гьял духьна. БицIидар адру хайлин хизанар учухьна илтIикIуру, ва учу дурар ЭКО-йиз гьязур апIурача, – ктибтура йиз сюгьбатчийи.
– «Дагъустан» республикайин мялумаарин агентствойи хабар туврайиганси, ЭКО-йин кюмекниинди 2023-пи йисан 115 бицIидар гъахьну, хъа 2024-пи йисан 10 процент зиина, – давам апIура Заира Курабеговайи. Дугъу гъапиганси, консультацияйиз гизаф пай дишалийир жюрбежюр уьзрарихъди аьлакьалуди илтIикIура.
– Ляхниъ саб дакьикьайиъкьан азад вахт шулдар, гьаз гъапиш анализар апIру отделениейиз илтIикIру инсанарин кьадар лап аьхюб ву. Иццрушнан диагноз тяйин апIбан бадали дурари гъахи анализарра вари ахтармиш дапIну ккунду.
Дюз гъапиш, гьамусяаьт духтрариин гизаф гъагъ алабхъна, иллагьки кагъзарихъди вуйи ляхин; кетIерццнайидарин кьадарра лап артухъ дубхьна. Саспиган йишвазкьан ляхниъ гъузру вахтар шулиз, – ухьт алдабхьура духтрилан. – Сарун мициб аьхю жавабдарвалин ляхин хилиз гъадабгъу вахтна, думу кIулизра адабгъну ккунду. Хъа учухь сагъ духьну, ич кюмекниинди бицIидар гъахьи бабари, алахъу вахтна, «ич бицIидар хьуз кюмек гъахьи баб-духтир» кIури шулзуз. Гьамцдар дакьикьйириъ ляхнин читинвалар вари кIваълан гьархру, – инчI ккидипнийи дугъу.
