Гюльнара Мягьмедова
Дагъустан Республикайин глава Сергей Меликовди Украинайиъ гъябгъюрайи хусуси метлеб айи дявдин операцияйин иштиракчйириз ва ветеранариз вуйи республикайин «Дагъларин жюрэтлувал» («Доблесть гор») программайиин къул гъизигну.
«Проектдиин ляхин апIуз гъубшу йисан хьадукра хъюгънийча. Думу федеральный «Игитарин вахт» программайиз барабар жюре региондин программа ву. Урусатдин Президент Владимир Путинди чан «прямой линияйиъ» гъапиганси, программайи жикъи вахтнан арайиъ чан мянфяаьтлувал улупну.
Узу швнубна саб ражари гъапиганси, дявдин женгарин иштиракчйириз дугъривалин, намуслувалин ва вафалувалин кьимат ужуди аьгъя. Дицисдар инсанар чпин улихь ди-йибгънайи месэла гьял апIбахьна жавабдарвалиинди лигуру, дурари чпиин хъугъвал али инсанарин ляхин кьяляхъ шлубси апIдар.
Гьелбетда, ихь гъийин читин вахтна инсандин ватанпервервал, Ватандиз вафалувал, жан фида апIувал сабпи йишв’ин дийигъна. Хусуси метлеб айи дявдин операцияйин иштиракчйирин хасият женгариъ лигим дубхьна. Аммаки гьарсаб ляхниъ аьгъювалар ва тажруба лазим ву. Хусуси метлеб айи дявдин операцияйин иштиракчйирихьан читин аьгьвалатнаан кIул адабгъуз шул кIури, умудлу вуза. Программа уьмриз кечирмиш апIруган иштиракчйири гъадагъу аьгъювалари гьюкуматдин гъуллугънаъ идара апIувалин ери за апIиди», – къайд гъапIнийи Сергей Меликовди.
Республикайин кIулиъ айирин гафариинди, хусуси метлеб айи дявдин операцияйин иштиракчйир вуйи дагъустанлуйирин арайиъ бажаранлу, республикайин идарйирин кIулиъ дийигъуз шлу инсанар хайлин а, дурарикан гьарсари чан кьягьялвал улупну. «Гьюкмин органариъ апIру ляхин – думу пучIу гъуллугъ дар, думу гъуллугъ Дагъустандин агъзрариинди агьалйирин уьмур рягьят апIбиин зигурайи зегьмет ву. Ихь республика СВО-йин иштиракчйирихьан гьюкуматдин гъуллугънаъ чпин мумкинвалар улупуз рякъяр ачмиш гъапIу сабпи регион гъабхьну. Вахтну улупурайиси, дурари чпин вазифйир лап ужуди тамам апIура.
Учу тешкиллувалин ляхин ккудубкIурача, гьаму вазлин гьацIариантина аьрзйир кьабул апIуз хъюгъдича. Программайиъ иштирак хьуз гъядягъю касар резервдиз гъадагъидича, дурариз ужуб тажруба айи насигьятчйири ляхин апIувалин аьгъювалар тувди. Региондиъ гъядягъю программайин ужударсдар иштиракчйир республикайиъ ляхниз гъадагъиди, ясана дурариз федеральный «Игитарин вахт» программайин аьхиримжи пайнаъ иштирак хьпан теклиф дивдича.
СВО-йин вари иштиракчйириз ва ветеранариз учухъди сабси жвуван халкьдин гъуллугънаъ хьуз, багъри ругар артмиш апIуз, уьмуми ляхник пай кивуз «Дагъларин жюрэтлувал» программайиъ иштирак хьуб теклиф апIураза. Гъит, «Дагъларин жюрэтлувал» ихь уьлкейин, республикайин шагьрарин ва районарин артмиш’валин заан кIакIарихьна гъягъбан уртахъ рякъ ибшри!» – гъапну Сергей Меликовди.
