Гюльнара Мягьямедова
Гъубшу йисан Урусатдин журналистарин союздин Дагъустандин региондин отделение, Редукторный поселокдиъ айи газатаринна журналарин чапханайи багахь хьайи сквериз йивну гъийиху журналистарин ччвур тувуб ккун апIури, Мягьячгъалайин администрацияйиз илтIикIнийи. Шагьрин мэр Юсуп Умавовди думу тIалаб тамам гъапIну.
22-пи январиъ Мягьячгъалайиъ чапханайин комплексдин гъвалахъ чпин ляхнин вазифйир тамам апIури гъийиху журналистариз бахш дапIнайи аллея ачмиш гъапIну. 5800 квадратдин метр жямяаьтлугъ йишв «Деврин тIалабариз гъилигу рягьятвал гъадабгъру йишвар ккабалгуб» федеральный программайиинди утканди гьязур дапIна.
Рягьятвал гъадабгърудар дусру уткан скамейкйир дивнайи, рангнан шарариинди дабалгнайи йишвахьна республикайин СМИ-йин вакилар, шагьрин агьалйир уч гъахьнийи. Гъирагъдиъ аьхю гъазнар иливну, дюгдин ашра убхьурайи.
Уч духьнайидарин улихь удучIвну гъулху шагьрин мэр Юсуп Уьмавовди гъийиху журналистариз бахш вуйи серенжемдин важиблуваликан гъапнийи. «Думу ихь ватандаш’валин ва инсанвалин буржи ву. Гъи Урусатди хусуси метлеб айи дявдин операция гъабхурайи вахтна журналистари, чпин жанар гьяйиф дарапIди, дявдин гьядисйирикан, йивбарикан мялуматар тувра, ихь эскрарин игитваликан ктибтура. Гьяйифки, дурарикан хайлиндар душмандин гюллдиан йихура. Гъи ухьу аьхиримжи йисари террористарин хил’ан гъушу Дагъустандин журналистарин гьюрматназ гьаму серенжем гъабхурахьа. Ачмиш апIурайи сквериъ гъийиху гьарсар журналистдин ччвурнахъ гьар кивдихьа. Думу ляхниъ шагьрин агьалйир ва шагьрин журналистарин тешкилатар иштирак хьиди», – гъапнийи Юсуп Уьмавовди.
Серенжемдиъ РД-йин мялуматарин ва чап апIбарин агентствойин кIулиъ айи Аьбдуразакь Жамалудиновра удучIвну гъулхнийи. «Сквер чпин ляхнин вазифйир тамам апIури гъийиху журналистарин рюгьяриз бахш дапIнайиб ву. Эгер ухьу гьамцдар йи-швар арайиз дархиш, ядиграр дидривиш, гъарашугъарин ва дустарин гьюрмат дюрюбхиш, ихь гележег акуб даршул. Гьаддиз, жикъи вахтнан арайиъ гьаму йишв ккабалгну, вари лазим вуйи ляхнар гъахбаз шагьрин кIулиъ айи Юсуп Уьмавовдиз, Урусатдин журналистарин союздин Дагъустандин региондин отделениейиз, РД-йин тикилишчивалин, архитектурайин ва ЖКХ-йин ва гьацира кюмек туву жара тешкилатариз чухсагъул мялум апIуз ккундузуз», – гъапнийийи Аьбдуразакь Жамалудиновди.
