Гюльнара Мягьямедова
27-пи январиъ Мягьячгъалайиъ республикайин «Дагъларин жюрэтлувал» программайин гьязурлугвал тямин апIуз региондин главайин табшуругъниинди арайиз дубхнайи рабочий дестейин сабпи заседание кIули гъубшну. Совещаниейиъ иштирак гъахьи депутатари, республикайин министерствйирин ва идарйирин кIулиъ айидари программайин гьарсаб пайнан месэлйир гьял гъапIнийи, гьадму гьисабнаъди асас сайт ляхник кипуб, техника жигьатнаан кюмек тувру гъуллугъ тешкил апIуб, СМИ-йиъ ва социальный сетариъ мялуматар тувуб…
КIваина хурача: му программа Урусатдин Президент Владимир Путиндин жягьтлувалиинди уьмриз кечирмиш апIурайи федеральный «Игитарин вахт» кIуру программайин жюре ву.
Пррограммайихъди аьлакьалу серенжемарин гьязурлугваларикан РД-йин Главайин гьюкуматдин гъуллугънан, кадрйирин ва гьюкуматдин наградйирин месэлйириз лигру управлениейин кIулиъ айи Земфира Кашкаевайи ктибтнийи. Программайин асас метлеб хусуси метлеб айи дявдин операцияйин иштиракчйир гъахьи дагъустанлуйиригъян идара апIбан удукьувалар айидар гъядягъюб ва дурар гележегдиъ республикайин жюрбежюр гъуллугъариъ лихуз гьязур апIуб ву.
«Проектдин иштиракчйириз гьюкуматдин ва муниципальный идарйириъ ляхин апIбан цирклиъ образованиейин программйир аьгъю апIуз мумкинвал тувди. Программайин гъалибчйир республикайин Главайи ва правительствойи дерккру гъуллугъарин резервдиз гъадагъиди», – гъапнийи Земфира Кашкаевайи.
Программа шубуб йишваз пай апIиди. Сабпи пайнаъ иштиракчйирин регистрация апIуру ва дурарихъди тестар гъахуру. Гьадму пайнаъ иштиракчйири ацIнайи анкетйирин натижйириз дилигну, дурар кюбпи пайнан собеседованиейиз гьаъди. Душваъ заан аьгъювалар улупдар, жямяаьтлугъ советдин къарарниинди, «Дагъларин жюрэтлувал» программайик кахьру. Гьаддин кьяляхъ иштиракчйири президентдин академияйин методикайиинди аьгъювалар гъадагъуз хъюгъди. Сад йисаз вуйи Программайиъ образованиейин модулар ва жюрбежюр йишвариъ практика гъабхуб а. Курс ккудубкIбан кьяляхъ финалистариз пишекарвалин гьязурлугвал гъадабгъбан гьякьнаан диплом тувру.
Программайин ужударсдар иштиракчйир республикайин Главайи федеральный программайин финалин пайназ гьауз мумкин ву.
