Мейлан Нежефов

Магьа имид-амдар шубуд йисди Урусатдин яракьлу кьувватари Украинайиъ гъабхурайи хусуси метлеб айи дявдин операцияйиъ ихь баяри гележегдин гъалибвалик чпин лайикьлу пай кивра. Дирбаш абйирин дагълу ифи жандиъ либхурайи игит худлари гьар йигъан жвуван хушниинди контракт йибтIури, душмнихъди женгнаъ айидарин дестйирра яркьу апIура.

 

Гьаци, 2025-пи йисан 21-пи январи Богдан Аскеровди, жвуван хушниинди Ватандиз вафалувалин гъуллугъ апIру рякъ кадабгъну, Урусатдин оборонайин министерствойихъди контракт гъийибтIну.
Богдан Загьидинович Аскеров 1981-пи йисан 15-пи мартди Хив райодин Хирижв гъулаъ бабкан гъахьну. Багъри гъулан мектеб ккудубкIну, жигьили 1999-2001-пи йисари Мурманск областдин Полярный шагьриъ Ватандин улихь чан гардандиъ айи эскервалин буржира баркаллувалиинди кIулиз адабгъуру.

2004-2009-пи йисари Богданди Смоленск шагьриъ экономиствалин курсариъ урхуру. Хайлин вахтна Тюмен областдин Когалым шагьриъ «Лукойл» компанияйи нафтлин ва газран мядандиъ операторди лихуру.
Богдан Аскеров 2022-пи йисан хизандихъди багъри гъулаз удучIвну гъюру. 2023-пи йисан апрелин вазлихъан 2024-пи йисандин август вазлизкьан Богданди багъри гъулаз регьбервал тувру. Хъасин райондин администрацияйин главайин, коррупцияйиз къаршу ляхин гъабхру кюмекчиди лихуру.

Чав контрактдиин къул зигбан метлебнакан ктибтури, Богдан Аскеровди гъапнийи: «Узуз шубур велед азуз. Хъа гьарсар намуслу абайин мурад-метлеб, чалантина вуйи веледарин уьмур акуб ва бахтлуб хьуб ву. Анжагъ гьадму метлеб ади гъапIу ният вуйиз.
Сабсана пуз ккундузуз. Фициб гъуллугънахь хьади узу лихурашра, инсанвал дубгру касарикан дарза. Я саб вахтнара узу аьхю пулар, хулар, машинар ва гъуллугъар ккунди хъергурра дарза. Вари вахтназ ккилигуру, хъа вахт – сабдизра, кIуруганси, дугъриданра, фуж наан ва фтиз лайикь вуш, вари вахтну улупуру. Магьа уьмри Ватан уьбхру кьягьяларин арайиъра хьуз узузра кьисмат гъабхьну».