21-пи февралиъ вари халкьарин бабан чIалнан Йигъ къайд апIура. Му йигъаз тялукь вуди, 18-пи февралиъ Дербент шагьрин Шамсулагь Аьлиевдин ччвурнахъ хъайи 4-пи нумрайин мектебдиъ бабан чIалназ бахш дапIнайи мярака кIули гъубшну.

 

Серенжем ашмиш апIури, Дербент шагьрин администрацияйин культурайин, жигьиларин политикайин ва спортдин управлениейиъ ляхин апIурайи пишекар Гюльпери Мирзабалаевайи чIалнан аьхю эгьемиятнакан ва важиблуваликан гъапнийи.

«Бабан чIал миллетдин асас бина ва халкьдин аьдатарин варитIан ижми шибритI вуйивал гьич саб вахтнара кIваълан гьапIну ккундар. Чан хусуси чIал адру миллет шлуб дар. Хъа гьарсаб миллетдин хизан, думу хизандиъ яшамиш шулайир чан миллетдиин шад ва дамагълу хьуз буржлу ву. Гьяйифки, ухьуз уьмриъ аьксина вуйи мисалар алахьура», – къайд гъапIнийи дугъу.

Сарпирди мяракайиъ мектебдин директор Гьяйдар Аьлекперов удучIвну гъулхнийи. Дугъу дуфнайи хялар ва мялимар шадлугънан мяракайихъди тебрик гъапIнийи.
«Ав, гьарсаб миллетдин, гьарсар касдин чан багъри чIал уьбхювал буржи ву. Му мярака тешкил апIбиин гизаф рази вуза, гьаз гъапиш думу ихь гъийин наслариз нумуна шула. Ухьу ихь бабан чIалназ асас фикир тувну ккунду, фицики чIал йислан-йисаз зяиф шула. Ихь метлеб – чIал уьбхювал вуйихь», – кIваин гъапIнийи дугъу.

Гизаф йисари Дербент шагьрин 4-пи нумрайин мектебдин директорди лихури гъахьи, хъа гьамус Дербент шагьрин образованиейин управлениейиъ начальникдин вазифйир тамам апIурайи Гюльназ Самедовайи му жюрейин мяракйир кми-кмиди тешкил дапIну ккуниваликан гъапнийи.

«Бабан чIалнан месэлйир узу гьар вахтна мектабарин директорарин улихь дивраза. Жиниб дар, бабан чIалар йислан-йисаз зяиф шула. Гьаз гъапиш мектебарин программа читинуб дубхьна, ЕГЭ-йиз гизаф фикир туврахьа, душваъра урус чIал ишлетмиш апIувал алабхъура, гьаз гъапиш ученикди аттестат гъадабгъну ккунду. Гьамцдар месэлйирихъди аьлакьалу вуди, бабан чIалариз гизаф манигъ’валар шула. Гьаци вушра, йиз терефнаан бабан чIаларин вари мялимарикан багъри чIалариз артухъ фикир тувувал ккун апIураза».

Мяракайиз му йигъан бицIидарихъди аьлакьа айи хайлин идарйириан хялар ва Дербент шагьрин мектебариъ бабан чIалариан дарсар киврайи вари мялимар, чпин мектабариъ урхурайидарр хъади дуфну, иштирак гьахьнийи. Серенжемдиъ табасаран, азербайжан, лезги, агъул, дарги ва имбу чIалариинди шиърар урхури, мяълийир ва ялхъвнар апIури, му мярака гизаф маракьлуди кIули гъубшнийи.

Мяракайиъ кюгьне вахтарин сумчрин, яшайишдин аьдатарикан, тарихи ва дявдин гьядисйирикан ктибтнийи.

Дербент шагьриъ табасаран чIалнан методикайин объединенияйин кIулиъ айи Нарижат Пашаевайи текрар апIурайиганси, мялимдиз, гьар йигъандин ляхниъ бабан чIалнаан баяр-шубарин аьгъюваларин дережа за апIбан бадали, ишлетмиш апIуз шлу мумкинвалар гизаф а. Гьаци вуйиган, цIибди жафа дизигну ккунду.

«Жвуван миллетдихьан ярхлаъ ади Урусатдин шагьрариъ, гъулариъ гизаф йисариинди яшамиш шули, хизандиъ бабан чIал ишлетмиш апIурайи ихь ватанагьлийир айивалин ухьу шагьидар вухьа. Дицдар хизанариъ айи бицIидарра табасаран чIалниинди рягьятди улхуру. Узу дицисдар хизанариин шад ва рази вуза, дурариз кIваантIан чухсагъул кIураза. Фуну юрдариъ ашра, бабан чIалниинди улхурайивали ухьу фицдар ватанперверар вуш улупуру», – гъапнийи Нарижат Турабовнайи.

Бабан чIалназ бахш дапIнайи мярака мициб заанвалиинди тешкил гъапIу 4-пи нумрайин мектебдин бабан чIалар киврайи ва гьацира имбу мялимариз аьхю чухсагъул кIурхьа.