Гъи саб Хив райондин гъулариъси, миди вуйи шагьрариъра, районарин гъулариъра штун, рякъюн ва зирзибилин суалар варитIан гъагъи гьялнаъ айидар ва учIрудар ву.
Эгер халкьдин гаф, алдагъру ликар ва апIру ляхин саб гъабхьиш, му суалар гьял апIуз якьинди чарйир агуйи. Хъа ихь халкьдик, гьяйифки, думу ктарихь. Анжагъ, гюм`ина удучIвну, ухьук зат тахсрар ктруганси, насигьятнан гафар-чIалар апIури шулухьа. Гьаддиз, улихь-кIулихь хьайидарира, ихь саб гаф адрувализ лигну, ухьу апIурайи аьрзйириз саб артухъ иб йивури адар, ва ухьу уччвудар, юкIв гъюдли апIру гафарихъди тухъ апIури дерккра.
Эгер ухьу, халкьдин метлеб саб вуйиб гьисаб дапIну, ихь гаф кIулиз адабгъурхьа дупну, ликар ижмиди удукьну, сар кIакIначи кадагъну, дугъахъди хъипну тIалаб гъапIиш, йиз фикриан, харжи шулдайи ва му суалар гьял апIуз чарасуз чарйир агуйи. Хъана текрар апIураза, гьяйифки, ухьук думу ктархьук…
Ихьуб, анжагъ сар хьтру-швахь сар гуршвуб, дитIну-хъдитIуб, дугъан кьяляхъ улхуб ву. Шлин гьяятдиз наънан ва фици шид гъюраш, гьяжатханайиан фила штун сес ебхьуруш ахтармиш апIури, дидин суракьнаъ хьуб аьхю метлеб вуйихь.
Хив райондин саб бязи гъулариан нирарси штар гъягъюра. Амма штухъди тяминвалин гъагъи гьялнаъ айи халкьдихьна душну, дурарихъди гаф-чIал дапIну, дерди гьял апIуз ва йикьрар дапIну къарар адабгъуз шуладар. Гьаз гъапиш, гьаруриз чав заанди ва ацIуди рякъюрахьуз. Шлихьна вушра душну, миннат апIуз ккунди адархьуз. Ухьу вари ихь йишвариин илмиди, улихь-кIулихь хьайидарикан тIалабар апIури, дурарихъ йирфар хъирчну, сар фуж-вуш ихь гъайгъушнаъ духьну, дугъу ихь метлеб кIулиз адабгъну ккундухьуз.
Ихь абйири аьгъдарди гъапундар, диришру бализ никк тувурдар кIури, гьаци хьузра ву. Ихь республикайин Глава Владимир Васильевди, респуб-ликайиз дубхнайи пул халкьдиз мянфяаьтлуди ва гъайгъу ади ишлетмиш апIуз, дидин кIул бисрур 100-дикан сарра адар, кIура.
Ухьу, халкь, ккебехъну имбукьан гагьди, сар фуж-вуш улихь-кIулихь хьайир майил-мадат шула кIури, архаинди гъудрузди, дугъкан тIалаб апIури, ухьура ликар алдагъиш, штун, рякъюн ва зирзибилин суалар гьял апIру чар-йир дихъиди ва ухди-кьанди арайиз ужудар натижйир гъиди. Дарш, айи саягъниинди гьам мектебдиз, бицIидарин багъариз, хулар-гъулариз пулихъди шид хувал аьдат хьибди.
