Айгуль Мягьямедова

Улихьна йигъари РД-йин Правительствойин председатель Аьбдулмуслим Аьбдулмуслимовдин жягьтлуваликкди кIули гъубшу Гьяракатниинди месэлйир гьял апIру штабдин совещаниейиъ республикайин муниципалитетар хъархъвас абхьру рукьан аьхю ишкIарихъди тямин апIбан месэлйириз гъилигнийи.

РД-йин экологияйин ва табиаьтдин девлетарин министр Ратмир Расуловди мялумат тувганси, 25-26-пи январи министерствойин вакилари 33 муниципалитетдиъ хъархъвас адабгъбан гьяракат, ихтияр адру йишварихь хъархъас дабхьбан дюшюшар, хъархъвас айи рукьан ишкIар ва дурар дивру йишвар гьязурди аш, ахтармишар гъухну.
Ихтияр адру йишварихь хъархъвас дабхьбан дюшюшар Къумтургъала, Гъяякент ва Дербент районариъ ашкар гъахьну. Министерствойин вакилари муниципалитетарин кIулиъ айидарин адресназ тIалабнан кагъзар хътаънийи. Улихьна къайдасузвалар айи Дагъустандин Огни шагьриъ марццишнан гьял рябкъюри-рябкъюри ужу дубхьна.

РД-йин Глава Сергей Меликовдин табшуругъниинди, региондиъ лазим кьадар контейнерар ва дурар дивру йишвар тямин апIбан ляхин ккебгъна.

Хасавюртдиъ меценатарин кюмекниинди 240 ишикI масу гъадагъну, дурар тялукь йишварихь дивра. Избербашдиъ 50 ишикI масу гъадагъна. Буйнакск шагьриъ ва райондиъ ишкIар гъадагъбан ляхин гьяракатнаъ а.
Дагъ. Огнийи 2025-пи йисаз вуйи бюджетдиъ хъархъвас абхьру цIийи рукьан ишкIар гъадагъбан бадали 1,5 миллион манат пул жара апIбанди ву.

Республикайин премьер-министри шагьрарин ва районарин кIулиъ айидарикан марццишнан ляхнин гьяракат гюзчиваликк уьбхюб ккун гъапIну.