Зубайдат Шябанова
Цци 1-пи январиан 2-пи феврализ Дагъустандин рякъяриъ 91 авария гъабхьну. Думу бедбахтвалин дюшюшариъ 18 кас гъийихну ва 120 касдиз зийнар гъахьну.
Гьаму вахтна гъахьи аварйирикан сабдиъ Севиля Мягьмудовайин хизанра ахъну. Гъубшу гьяфтайи узу дугъахъди сюгьбат гъубхнийза.
«Рякъюъ аварияйин дюшюшар рябкъруган ва думу бедбахтвалиъ инсанар сагъди гъузиган, дугъриданна, ухьу хатIайихьан уьрхюрайир Сар Аллагь вуйивалихъ хъугъурхьа. Ав, хъугъай, Думу а!
Узу машин хъапIуз дудубгъну бицIи вахттIан дариз. Саб ражари гъулаз, абйир-бабариин улукьуз гъягъруган, жилирикан, миннатар апIури, руль узухьна тувуб ккун гъапIнийза. Дюзди кIуруш, жилириз машин узухьна тувуз ккунди адайи, хъа вушра, йиз гафариккан ва миннатариккан ккададархьрайи дугъу саб бицIи манзилназ хъапIуз тувнийи.
Аварияйиъ ич машин шубуб ражари илтIибкIурайган, учу сагъди гъита, жан Аллагь, кIуру фикиртIан гъюрадайиз. Учу чIивиди гъузунчу. ЧIивиди гъузхъанмина уьмур жара саягъ дигиш гъахьнийи. Машиндиан эдеуриз, дюзди кIуруш, жилиина иццру дапIнайи гарднихъан хъичIихну, кьамкьариина ис гъахьириз, йиз жилирин сабпи гафар гъеерхьган, кIваз иццру гъапIнийиз. Дугъу, «Уву гьапIнуш лиг, ухьу аьжаликк ккитунва, бейгъуш! Увуз узура, веледарра йихуз ккун гъабхьунвуз! Уву машин фу гьялназ гъабхнуш, лиг!!!», – кIури, гьарйир гъапIнийи.
Саб дупну учлан илтIишу инсанарин машинарикан сабдиъ итну, учу больницайиз гъухнийи. Рякъюъ жилирин хабахъ хъайи аьхюну риш ифи кади эдерчуз хъюгъю, хъа йиз униъ айи бицIину риш амриан душнайи. Гардниан йивурайи жварари узхьан аьхюну шурахьинди кIул илбицузкьан шуладайзухьан. Узу йиз хизан сагъди гъузуз Аллагьдиз дюъйир урхури, ишури деънийза. Машин хъапIрайи яшнаъ айи жвуву, ич бицIи шубари нефес хътабгъурайиваликан ва Аллагьди дурариз кюмек тувруваликан кIурайи. Гьадму арайиъ жилириан гьарай утIубччву: «ГъакIну, йиз риш гъакIну! Варибдин тахсиркар уву вува! Уву йиз веледар гъийихунва! Му тахсиркарвалиан узу уьмурлуг увлан хил алдабгъударза! Вари уву вува…!!!» – чIигъар апIуйи дугъу, узухьинди лигури.
Гьадму арайиъ машин хъапIрайи жви дугъан хилхъан хъичIиху ва аьхю сесниинди: «Сикин йихь, сабур апIин! Думу учв фициб гьялнаъ аш, рябкъюрадарнуз?! Дугъу, чав нефес гуж-балайиинди хътабгъура! ЧIяаьн ву гьарйир апIуб! Сар дадайизра чан веледариз хатIа дубхьну ккундар! Сарун дугъаз гаф макIан!» – гъапи.
Думуган узу йиз жилириз даккнибдин гъавриъ гъахьнийза. Кьанди, йигъар улдучIвбан кьяляхъ, думу узухьна, хил алдабгъ кIури, гъафнийи ва гьадму вахтна чав фу кIураш гьисс дарапIрайиваликан гъапнийи. Узу йиз тахсир марцц апIурадарза. Хъа иллагьки гьацдар гъагъи дюшюшариъ инсандин дугъри маш рябкъюру.
Мягьячгъалайиъ больницайиъ узу шубарихъди кьюб вазтIан артухъ дахъну гъахьунза. Шубар сагъ гъахьну. Духтрари уз’ин миржиб вазлин арайиъ гардан ва юкьян гьар дирибшври гъибтру алат иливну. Узу тазади деуз, лицуз, кIул илтIибкIуз гъудубгъунза… Зийнар яваш-явашди сагъ шула. Амма, аварияйин кьяляхъ варитIан багъри инсандикан гъеерхьу гафарикан йиз кIваз уьмурлуг сагъ апIуз даршлу зиян гъабхьну», – ктибтнийи ич сюгьбатнаъ Севиля Мягьмудовайи.
Больницайиан удучIву Севиляйи ва дугъан шубари хайлин вазари сагъвалин курс хулаъ гъабхури гъахьну. Дугъан жилириз бицIи зийнартIан гъахьундар. Мушваъ тахсиркар гужназ машин чан ихтиярназ гъадабгъу дишагьли вуш вая, рякъюн хатIалуваларикан аьгъядира-аьгъяди дугъахьна руль туву жилир вуш, учву жаваб тувай.
Хъа хатIа-балайин кьяляхъ тахсиркар гъагну кIури, фукIара дигиш апIуз шлуб дар. Гьаддиз гьарсар касди рякъярин хатIасузвализ гьаммишан фикир туври, мугъаятвал уьбхюри ккунду.
РД-йин МВД-йин гъубшу йисандин улупбариинди, Дагъустандиъ 2024-пи йисан 1-пи январилан 31-пи декабриз 1502 авария гъахьну. Думу бедбахтвалин дюшюшариъ 276 кас гъийихну, гьадму гьисабнаан 29 бицIир, хъа 2178 касдиз зийнар гъахьну.
Гьаму улупбариан рябкъюрайиганси, рякъяриъ хатIа-балайин дюшюшар йислан-йисаз артухъ шула, гьаддиз гьарсар касди мугъаятвал ва чан сагъвалин хатIасузвал чав дюбхну ккунду.
