Мейлан Нежефов

2025-пи йис Ватан уьбхрударин йис вуди тяйин дапIнайивализ лигну, Хив райондиъ му йисаз тялукь вуди йицIбариинди ватанпервервалин жюрбежюр серенжемар планламиш дапIна. Магьа 11-пи феврали Райондин культурайинна мажал вахт гьапIбан центрин (РКДЦ) улихь «Гъалибвалин пайдагъ» акция кIули гъубшну.

Акцияйиъ райондин администрацияйин гьякимар, культурайин хуларин, мектебарин, бицIидарин багъарин, гъуларин администрацйирин, военный комиссариатдин гъуллугъчйир, Юнармияйин, «Сарпидарин гьяракат» жямяаьтлугъ тешкилатдин ва ТОКС-дин дестйирин вакилар иштирак гъахьнийи.
Уч духьнайидарин улихь «Ачухъ Урусат» федеральный проектдин республикайиъ айи координатор Амир Гьяжибагьандов ва Асккан Яракк гъулан агьали, жикъи вахтназ вуйи отпускайиз дуфнайи хусуси метлеб айи дявдин операцияйин иштиракчи Мадан Маданов удучIвну гъулхнийи.
Акцияйин гьякьнаан чан фикрар ачухъ апIуб ккун апIури, узу Мадановдихьна илтIикIнийза.

«Эгер ухьуз аргъаж шулайи насларин бедендиъ закур йигъан ватанпервервалин рюгь уягъ дубхьну ккунди аш, гъи гьамцдар жямяаьтлугъ ляхнариз ухьу кми-кмиди фикир туври ккунду. Интернетдиъ айи лутйири, ихь баяр-шубар алдатмиш апIури ва тарих жараси ккитIибкIуз ккунди, чарйир агурайи вахтна ухьу райондиан Ватандин Аьхю дявдиъ иштирак гъахьи 1800 кас игит абйирикан, Чечендиъ, Афгъанистандиъ, Сирияйиъ, Къарабахдиъ кIули гъушу ва жара операцйириъ варжариинди иштирак гъахьи кьягьяларикан ва гьацира, гъи райондин гъулариан миллетчйирихъди женг гъабхурайи дагълу люкьяри улупурайи гьунарарикан баяр-шубариз кьатI’иди ктибтури ккунду. Гъит дурариз игитар ихь арайиъ айиб аьгъю ибшри. Ихь дирбаш абйир дурариз аьсрариинди нумунади гъузри. Дарибшри-дярябкъри, амма закур йигъан хаин душман хъана алжагъуз кьаст гъапIиш, дугъан унтIаъ йивру игит баяр ихь ругарилан кам даришри», – гъапнийи Мадан Мадановди.