Гюлягьмад Маллялиев
Улихьган Табасарандин гьарсаб гъулаъ, гьялнаан адабхънайи рякъ дюз апIру, жилиан шид удубчIвбаан, ламун дубхьнайи руг гъябкъиган, душв ачмиш дапIну, булагъ йибтIру, гъулан кевшанариин гъелемар кивру, чIуру йимишдин гьарар гъяни чIвумччварихъди улурхьру камаллу касар гизаф ади гъахьну. Гьаддиз улихьган гьарсаб гъулаъ низам-къайда, аьл-адалат ади, гьарсаб гъулан аьтраф чрушну, багълар-бахчйири ккапIнади гъабхьну.
Гъи ихь деврин инсанарин мурад-метлебар жарадар духьна, дурарин уьмрин асас мяна вари жвуван хулаз хъчIюбхюб, жямяаьтдинуб тIараш апIуб дубхьна. Гьаддиз гъулариъ хифран гьарарра кмиди аьлдяхюри масу тувра, йимишдин багълариъ, бегьер тувру гьар екIвун мурзнакк ккипну, хулар апIура, жямяаьтди ишлетмиш апIурайи штун кIулариан вуйи шид турбйири ипну, жвуван хулариз зигура. Хъа тазади кивнайи гъелемар, улурхьнайи гьарар, акв хьади гъилицишра, агуз читинди ву.
Вахт-вахтарик, тазади республикайин кIулиъ дийигънайири, «акция» мялум дапIну, Дагъустандин жилариин сад-швнуд агъзур гьарар кивурхьа кIури, буйругъ-гьарай гъапIган, гьарсаб райондин гьякимари ва жямяаьтлугъ касари, мектебдиъ урхурайидаризра гъач дупну, меркездиан тяйин дапIнайи йигъан уч духьну, жилик таза чIвумччвар курччвру, му «тарихи гьядиса» шиклар йивбиинди сайтариъ, социалин сетарин машариъ уьмурлугъ апIуру ва дидхъантина гъелемарикан ва акцияйикан марцциди кIваълан гьархру. Кьюб-шубуб вазлилан 50-100 гъелемдикан 5-10-кьан чIиви гъахьиш, шюкюр Аллагьдиз пуз шулу.
Гьамцдар акцйир 2026-2017-пи йисарира гъахьнийи, «Чру километрйир» акцияйиинди вари Дагъустан кьялаъ тIапIуз чарйир гъизигнийи 2018-2019-пи йисарира. Амма гьаз-вуш Дагъустандин жилариин думу акцйирин кьяляхъ агъзрариинди гьарар-кюлер ктучIвундар…
Гьаму гьяфтайиъ Сергей Меликовди, Мягьячгъалайин гьацIкьялаъ айи гьарар алдатIуваликан шагьрин кIулиъ айидариз анжагъ социальный сетариан мялум хьуваликан наразиди улхури, му читин месэла гьял апIуз ухдитIан вахт дуфнайиваликан гъапну. Дугъу шагьрарин ва районарин кIулиъ айидариз, чпи идара апIурайи йишвариъ гьарар-кюлерин чрушнан гьякьнаан дурари гъайгъу дизигну ккунивал кIваин гъапIну.
Гьелбетда, Мягьячгъала шагьрин гьюкмари чпи му ляхниз гьязур вуйиваликан дишлади хабар тувну. «2025-пи йисан сабпи гьацIаъ Дагъустандин меркездиъ 2 агъзурилан зиина гьарар кивуз кка… Дидлан савайи, Аьхю Гъалибвалин 80 йис къайд апIбан машквран серенжемарин дахилнаъди шагьрин жюрбежюр пIипIариъ алвер апIру объектарин улихь думу дараматарин эйсйирихъди 80 аьхю гьарар кивбан йикьрар гъийитIунча», – хабар тувну Мягьячгъалайин мэри сарпи заместитель Нариман Темуркаевди.
Гьелбетки, багарихьди гьамциб гьязурлугваликан имбу шагьрарин ва районарин кIулиъ айидарира дупну ккунду, аьдат гьациб ву.
Хъа улихь-кIулихь хьайири дарпиди, жвуву фикир дапIну, инсанариз мянфяаьт, экологияйин аьгьвалат сагъ ибшри дупну, му ляхин гьял апIуз шулдайкIан?! Гъаври ахъру йигьгиз ярхлаан цIа улупуб чIяаьн ву.
