Зубайдат Шябанова

Гьаму йигъари Табасаран райондиъ Кьалухъ Мирзайин ччвурнахъ хъайи спортдин дараматариъ Ватан уьбхрударин йигъаз бахш вуди мектебариъ урхурайидарин арайиъ юкьяр дисбаан талитар кIули гъушну. Табасаран райондин администрацияйин кюмекниинди 4-пи нумрайин бицIидаризна живанариз вуйи спортдин мектебди тешкил гъапIу талитариъ, 2010-2018-пи йисариъ бабкан гъахьи 200-тIан артухъ бицIидар ва живанар иштирак гъахьну.

 

Талитарин натижйириинди командйирин арайиъ уьмуми сабпи йишв Гурихъ гъулан командайи гъадабгъну. Кьюбпи йишван сагьиб Хючна гъулан команда гъахьну. Ва шубубпи йишв’ина «Олимп» командайин спортсменар удучIвну (Хючна).

4-пи нумрайин бицIидаризна живанариз вуйи спортдин мектебдин директор Мягьямед Исмяиловди му талитар тешкил апIбаъ жанлуди иштирак гъахьи тренерарин коллективдиз, меценат Байрамяли Мусаевдиз ва тамашачйириз чухсагъул мялум гъапIну.

Гъалибчйириз пешкешар туврайи вахтна Табасаран райондин администрацияйин спортдин ва туризмдин цирклиан кIулин пишекар Вадим Рашидовди къайд гъапIганси, му жюрейин серенжемари спортдин аваза за апIувалихъди сабси, аргъаж шулайи наслин ватанпервер тербия ва багъри аьдатарихьна гьюрмат артухъ апIура.