Айгуль Мягьямедова

Дагъустан Республикайин культурайин министерствойи «Культурайин цирклин земский гъуллугъчи» федеральный программайиз гъадагъбан бадали, муниципалитетариан аьрзйир кьабул апIуз хъюгърайиваликан мялумат тувра. Программайин метлеб 50 агъзуртIан цIибди агьалйир яшамиш шулайи гъулариъ культурайин гъуллугъчйир гьуркIри адрувалин месэла гьял апIуб ву. Программайиъ пишекарвалин заан ясана кьялан образование айидарихьан иштирак хьуз шулу.

 

Аьрзйирра хъади документар 2025-пи йисан 4-пи мартдиан 2025-пи йисан 18-пи мартдизкьан кьабул апIиди.

«Программайин метлеб гъуларин клубарин, яратмишарин хуларин, музыкайин мектебарин, музеярин, библиотекйирин, яна ихь культурайин тафавутлувал, аьдатарин кьиматлувал уьбхру, аргъаж шулайи наслариз тербия тувру гъуллугъчйириз кюмек тувуб ву», – къайд гъапIну уьлкейин Президент Владимир Путинди.

«Культурайин цирклин земский гъуллугъчи» проектдин кюмекниинди гьаму йисан ихь республикайиъ культурайин земский 6 гъуллугъчи ляхниъ дерккбанди ву. Гьюкуматдин программайин иштиракчйириз сабишв’индии саб миллион манат тувди. Улупнайи гъулаз лихуз гъушу кас, душваъ 5 йисан дилихну ккунду. Эгер 5 йисан дилихди ляхниан удучIвиш, гьюкуматдин пул кьяляхъ тувну ккунду.
Программа уьмриз кечирмиш апIбан кьюбпи пай гьаму йисан 15-пи апрелилан 15-пи июлизкьан давам хьибди.