Наврузбег Керимов
Дявдин женгариъ гьар йигъан цIигъ гъяди, инсандин зийнар, аьжалар гъяркъю, дустарихъ мягьрум гъахьи эскрариз му гьядисйирикан, хайлин вахт улдубчIвишра, ктибтуз ккунди шулдар. Дурарин гъавриъ ахъуз шулу –дявди инсан инсафсуз хьуз, Аллагьди халкь гъапIу учвсир жара кас йикIуз мажбур апIуру, хъа му гьякьикьат аьгь апIуз къанажагълу фагьум хъайириз читинди ву.
«Урусат варитIан гужли уьлкйирикан саб ву. Ихь эскрар хусуси метлеб айи дявдин операцияйиз Украинайин халкь миллетчйирихьан азад апIидича кIури, ният ади гъягъюра. Хъа ибариз гъеебхьубдинна улариз гъябкъюбдиъ аьхю фаркьвал а, яна уву думу дявдин иштиракчи гъахьиган, дявдин женгар гъяркъиган, дидкан вуйи яв сифте фикир бегьемди дигиш шулу», – ккебгънийи узухъди вуйи сюгьбат Дагъустандин региондин жямяаьтлугъ «Дагъларин кIваинди ими» тешкилатдин Дагъ. Огни шагьриъ айи филиалин председатель Аьбдулла Мягьямедовди.
Аьбдулла Шамсутдинович Мягьямедов 1987-пи йисан Табасаран райондиъ Кюрягъ гъулаъ аьхю хизандиъ бабкан гъахьну. Дугъан адаш Шамсутдин Маллагьямзаевич ва дада Герекмез Аьгьмадовна – игит абйир-бабар ву – дурари 13 бицIир (9 бай ва 4 риш) тербияламиш гъапIну. Аьбдулла варитIан бицIинур ву. Дугъан улихь хьайи шубур чвера Ватандин гъуллугънаъ а. Аьбдуризакь ва Гьяжи Мурманскдиъ штун кканакди гъябгъру гимийиин, хъа Мягьямед Каспийск шагьриъ ерлешмиш дубхьнайи дазуйиин али кьушмарин частнаъ гъуллугъ апIура.
Мектеб ккудубкIу Аьбдулла, армияйиъ эскервалин буржи тамам дапIну, мармардашдихъди вуйи ляхнарин адлу уста шулу. 2019-пи йисан дугъу чан чвуччву-хъди Дагъ. Огни шагьриъ гъван дябхру цех ачмиш апIуру. 2022-пи йисан 22-пи сентябри Аьбдулла мобилизацияйин дахилнаъди хусуси метлеб айи дявдин операция гъябгъюрайи йишваз гъухнийи. ЦIийина мобилизацияйикк ккахъдарикан ибарат гъабхьи дестейиз Чечен Республикайин Шали гъулаъ ерлемиш дубхьнайи 71718-пи военный частнаъ яракьдиан йивуз, зиян гъабхьидариз кюмек апIуз улупнийи ва женгнаъ лазим шлу жара аьгъювалар тувнийи, хъасин, саб вазлилан, Запорожьейин терефназ гъухнийи.
«Душваъ гъи ихь хайлин жигьил эскрар дийихна, агъзрариинди сагъвалихъ мягьрум духьна. Гьар ражну командованиейин буйругъ тамам апIуз гъягъруган, завлан гъюрайи снарядди уву йикIур дупну фикир шуйи. ВаритIан учIвруб ва дерд шлуб увухъди сад йигъан вушра саб дестейиъ гъахьи эскер яв улихь йикIувал ва уву дугъан кIурбар уч апIувал ву. Дицисдар дюшюшар му дявдиъ вари ихь баяриз дяркъна. Гьадмуган дурариз дявйирикан вуйи ихтилатар апIуз ккундар», – ачухъ апIура узу макьалайин эвелиъ гъитIибкку месэлайин гьякьнаан чан фикрар Аьбдуллагь Мягьямедовди.
«Зийнар духьну, хайлин ватна госпиталариъра дахъунза. Гьамусяаьт узу операцияйин кьяляхъ вуйи реабилитацияйиъ аза. Узу Дагъустандин региондин жямяаьтлугъ «Дагъларин кIваинди ими» тешкилатдин Дагъ. Огнийиъ айи отделениейин кIулиъ дийигъу-валин асас метлеб хусуси метлеб айи дявдин операцияйин вахтнаъ гъудургу эскрар агуз кюмек апIуб, дурарин хизанариз хил гьачIабккуб вуйиз. Иншаллагь, думу операцияйиъ иштирак гъахьи ва мялум дарди гъудургу вари баяр агуз кюмек апIидихьа», – гъапнийи инанмиш’вал кади Аьбдуллагьди.
Йиз сюгьбатчийин ифдиъ ватан уьбхрюрин гьевес аьхю насларихьан гъубзнайиб ву. Дугъан аьхю аба Маллагьямза Мягьямедовра Ватандин Аьхю дявдин иштиракчи вуйи. «Учуз, худлариз, аба гъяркъюндарчуз, гьаз гъапиш дявдиъ гъахьи зийнариан думу, 32 яшнаъ ади, кечмиш гъахьну. Хъа адашдин ихтилатариинди, аба 1942-пи ва 1943-пи йисари Ржев шагьур фашистарихьан азад апIбан гъагъи женгариъ иштирак гъахьну. Госпиталиъ дугъан хил маршал Георгий Жуковди гьюрматниинди гъибисну. Аба «Ржев шагьур азад апIбаз лигну» медалихъди лишанлу гъапIуб аьгъячуз. Хъа йиз адашра, гъагъи уьзриан ухди кечмиш гъахьну. Дайиш, аьхю абайикан хъанара артухъ мялумат тувдийи», – ктибтнийи игит абайин хтули.
Хусуси метлеб айи дявдин операцияйин дахилнаъди учв иштирак гъахьи женгариъ улупу жюрэтлувализ, чан улихь дивнайи дявдин месэлйир фагьумлуди кIулиз адагъбаз лигну, Аьбдуллагь Мягьямедов «Дирбашвализ лигну», «Женгариъ дирбаш’вал улупбаз лигну», Жуковдин ва Суворовдин медалариинди лишанлу дапIна.
