Айгуль Мягьямедова
2024-пи йисан Урусатдин ФАС-дин (Федеральный Антимонопольный гъуллугънан) Дагъустандиъ айи Управлениейи, чав ахтармишар кIули гъуху цирклариъ ляхин апIурайи карханйириин, тешкилатариин ва гъуллугъариин, къанун чIур апIбаз лигну 69,3 миллион манатдин журумар илитIну, хъа гъуллугъарин кIулиъ айи 351 кас административ жавабдарвалихъна гъахну. Дидин гьякьнаан 3-пи мартди махлукьатлу мялуматарин дакьатарин вакиларихъди вуйи пресс-конференцияйиъ УФАС-дин кIулиъ айи Каир Бабаевди мялумат тувнийи.
Улупнайи кьадар журумар муштарйириз лазим вуйи ерийин электрический энергия тутрувбахъди (62 миллион манатдилан зиина; 2023-пи йисан – 26,4 миллион манатдин) ва гьюкуматдин закупкйир гъахруган деету нукьсанваларихъди ва гъалатIарихъди (5,2 миллион манатдилан зиина; 2023-пи йисан 8,3 миллион манатдин) аьлакьалу ву.
2024-пи йисан Дагъустандин УФАС-ди, конкуренция уьбхбан федеральный къанун чIур апIбан лишнар кади, 11 дело гъитIирккнийи (2023-пи йисан дурарин кьадар 8 вуйи); гьадму кьадарнакан 9 делойиан натижалу къарар кьабул гъапIну, хъа 2 дело, къайда чIур апIувал адруб тяйин дапIну, хъяркьну.
Гъубшу йисан УФАС-ди Дагъустан Республикайин Правительствойин председателин адресназ ва Мягьячгъалайин администрацияйин адресназ ихтиятвал уьбхбан 2 хабардарвал (предостережение) тувна. Гьацира, сач 8 хабардарвал (предупреждение) тувну, дурарикан 5 гьюкмин органариз: муниципальный образованйириз – 4, федеральный органдин йишв’ин али отделениейиз – 1. Хабардарвал гъапIнушра, миржибдикан 2 дюшюшдиъ къанун чIур апIувалар арайиан адагъундар. Мидланна савайи, гьюкмин органариина, дурари антимонопольный къанун чIур апIбаз лигну, 2 дело гъитIирккну – Дагъустандин Огни шагьрин администрацияйиина ва ригъ алабхъру терефнан Каспийскдин бассейндин штун идарайиина.
2024-пи йисан Дагъустандин УФАС-ди, рекламайин гьякьнаан вуйи къанун чIур апIбаз лигну, 30 дело гъитIирккну, думу кьадарнакан 29 дюшюшдиъ чIур апIувалар тасдикь гъахьну.
Каир Бабаевди къайд гъапIганси, региондиъ эдебсуз рекламара тарабгъура. Гизафси думу жюре реклама тарабгърудар медицинайин центрар ву. УФАС-ди думу жюре рекламайи, рекламайин гьякьнаан вуйи къанун чIур апIурайиб тяйин гъапIну ва «Лекарь» медицинайин центриз хабардар апIру кагъаз хътапIну.
