Наргиз Гюлечова

11-пи мартдиъ Каспийск шагьриъ «Анжи Арена» стадиондиин Урусатдин Кубокдин финалин ¼ пайнаан «Динамо» (Мягьячгъала) ва «Локомотив» (Москва) футболин командйирин арайиъ талитар гъахьну.

Футболин матч башламиш апIури, тупраз сабпи лик гъивур машгьур футболист Юрий Жирков вуйи. Имбуну вахтари шулайи талитарси дарди, му ражари футболин майдандиин футболистари чпин ляхин лап аьламатниинди, лигуз дуфнайи инсанарик артухъ гьевес капIруганси тамам апIурайи. Аммаки футболин ужуди гъавриъ адру касдизра рябкъюрайи – суд’я ихь республикайин командайихьна «кьяниди» лигура: «Динамо» клубдин вакилари футбол гъябгъюрайи вахтна деетурайи гъалатIар аьхюдар даршра, суд’яйи дурариз кми-кмиди гъатху карточкйир улупуйи, хъа гьаз-вуш тмуну командайин тахсрар дугъаз затра рякъюрдайи. Судьяйин гьамциб ляхнин натижайиъ дагъустан командайиъ, футбол уйнамиш апIури, анжагъ йицIур футболист гъузнийи, ва дурарихьан тажрубалу «Локомотив» клубдин футболистариз дурум тувуз гъабхьундайи.

2:1 гьисабниинди ккудубкIу матчдин кьяляхъ «Динамо» Мягьячгъала командайин кIулин тренер Хасанби Биджиевди къайд гъапIганси, ерли футболистарихьна дугъан наразивал адар. «Гъи натижа мициб гьаз дубхьнаш, учу гъавриъ ача. Ухдихъанмина ихь командайихьна вуйи янашмиш’вал гьамциб ву… Гьаддиз мюгьтал хьпан ляхин адар», – аьлава гъапIну тренери.