Зубайдат Шябанова
Гъубшу гьяфтайи республикайин айтIан ляхнариз лигру министр Аьбдурашид Мягьямедовди министерствойин 2024-пи йисандин ляхнин натижйириз бахш дапIнайи пресс-конференцияйиъ мялумат тувганси, цIийи йис ккебгъхъанмина Дагъустандиъ наркотикарихъди аьлакьалу тахсиркарвалин дюшюшар артухъ гъахьну. Мисалназ, 2024-пи йисан январин вазли наркотикарихъди аьлакьалу вуйи 133 дюшюш гьисабназ гъадагъну, хъа цци январин вазли – 430. Тялукь вахтнахь тевган, му улупбар шубуб ражаритIан артухъ ву.
Наркотикар хьади гъидисдариз, дурар хулаъ уьрхюрайидариз ва дурарихъди алвер апIурайидариз судди хайлин йисариз дустагъ гьадабтIруваликан ва дурариин аьхю кьадар журум илибтIруваликан мялум вушра, наркодилерарин кучIларихъ хъугъну, бицIи вахтнан арайиъ девлетлу хьуз ккуни касари думу зегьер фу чара дапIнура тарабгъуз рякъяр агура.
Мартдин эвелариъ СКФО-йиъ айи Урусатдин МВД-йин полицияйин вакилари Москвайиан Мягьячгъалайиз гъюрайи рейсовый автобус федеральный «Артезианская» КПП-йиин ахтармиш апIурайи вахтна, дурариз сар дишагьлийин сумкайиъ аьхю кьадар медоморфин наркотик гъибтIнайи пакет гъибихъну.
Тахсиркар Хасавюрт райондин агьали, 21 йисаъ айи жигьил риш вуйи. Полицияйин вакилариз туву мялуматариинди, дугъу наркотик Москва шагьриъ чаз ишлетмиш апIуз масу гъадабгъуб ву. Думу шур’ина уголовный дело гъитIибкIна.
Улихьна йигъари Мягьячгъала шагьриъ Али-Гьяжи Акушинскийин ччвурнахъ хъайи проспектдиъ Дагъустандин МВД-йин УКОН-дин гъуллугъчйири оперативный серенжемар гъахурайи вахтна, 32 йисаъ айи дишагьлийихь 300 грамм эфедрон гъибихъну. Дишагьлийин гафариинди, думу пучIу гъазанж абгури, интернетдиъ наркотикар масу туврурихъди таниш гъахьну ва, масу тувуб метлеб ади, дугъхьан пулихъ наркотикар гъадагъну.
Региондин МВД-йин мялуматариинди, улихьнаси Табасаран райондин СиртIич гъулан агьали, 25 йис дубхьнайи жигьил наркотиксиб сурсат хьади гъидисну. ПучIу наркотик дугъу чаз ишлетмиш апIуз масу гъадабгъуб вуйи.
МВД-йин гъуллугъчйириз Буйнагъскдиъра 31 йисаъ айи агьалийи «лирика» наркотик масу туврайибдикан мялумат гъафну.
Наркотикар къанунсузди уьбхюрайивалин, дурар гьязур апIурайивалин ва масу туврайивалин дюшюшар ЧIарада, Хасавюрт, Кьасумкент, Гъяякент районариъ, Мягьячгъала, Дербент, Каспийск, Къизлар шагьрариъра ашкар духьна. Силисар гъахбан натижайиъ гъидису вари тахсиркрариина уголовный делойир арццна. Дурарин арайиъ яшар бегьем духьну адру 16 йисаъ айи риш ва харижи уьлкйириан дуфнайи касарра а.
Аьхиримжи вахтар Дагъустандиъ социалин сетариъ, абйир-бабарин чатариъ ва жара мессенджерариъ «клубничный квик» ччвур али наркотик, гъяфитси гъибиржну, мектебариъ бицIидарин арайиъ тарабгъурайиваликанра мялуматар рякъюри шулу. Думу мялуматариинди, гьациб гъяфит ишлетмиш гъапIу бицIир гъагъи гьялнаъ ахъру.
Гьаму мисалариан рябкъюрайиганси, наркотикар тарагъувалихъди аьлакьалу дюшюшар гъюблан-гъюбаз артухъ шулайиваликан вуйи республикайин МВД-йин улупбар гьякьлудар ву. Гьаддиз шаклу инсанарихьан ярхла гъузиш, жвуван веледариз наркотикарин зарарнакан ва хатIалуваликан гъимиди учву мялуматар тувиш, харжи даршул. Закур дугъаз, чIурубра ужуб ву, кIурудар алахьуб мумкин ву. Гьаддиз закурин аштIан гъийин жук ужи ву, кIуру ихь абйирин айту магьарханай.
