Гьарсаб дявди инсанарин юкIвариъ чан учIвру шил гъибтру. Диди кьисматар ва уьмрар пуч, ислягь яшайишдикан вуйи хиялар барбатI апIуру, гевюл ккудудубкIру дарвалиъ ипру…
Дявдин чIуру дарсар гьавайиди гъюдудучIвбан бадали шаирари зигурайи чарйир аьхюдар ву. Дурари баярихъ мягьрум гъахьи дадйирин, жилар накьварик киву хпарин, абйир хътарди аьхю шулайи веледарин суза ва дерд чпинубси гьисс апIури, думу лизи кагъзиина адахъура – инсаниятдиз ебхьуз, му мусибат текрар дархьбан бадали вари кьувватар жалб апIуз.
Гъийин Литературайин машнаъ хусуси метлеб айи дявдин операцияйин хажалатнан гьядисйирикан табасаран авторари дидикIнайи шиърар туврача.

 

Сувайнат КЮРЕБЕГОВА

****

Аьзиз дада, багахьлуйир, гъуландар!
Йиз дерд кади, дар мапIанай ичв юкIвар!
ГъакIундарзу! ТIирхураза ичв кIул’ин,
Илдандин люкь духьназукан му зав’ин.

Узу гьялал гъапIунза йиз жигьил жан,
Писвалихьан уьбхюз кIури ихь Ватан.
Узу фида гъапIунза йиз гележег,
Душмнарихъди дубхну инсаф адру женг.

Кьягьялихъди дийигъназа саб цIарнаъ,
Учу сабан имича думу женгнаъ.
Ккагъундарчу! ТIирхурача ичв кIул’ин,
Аьзиз дада, юкIв ив мухриъ илдандин!

****

Мюрхюн гьарар, мишанайчва, баркавнар,
Думу баяр сарун чIиви шлудар дар,
Му дюн’яйин акв дурариз рябкъруб дар,
Думу зийнар сарун сагъра шлудар дар.

Ичв циркларик кубкIна дурарин ифи,
Зийнар гъитна гюллйири лизи йиф’ин.
Фици ккарццру дада, бай кьяляхъ дарфи?
Фици ккарццру жигьил хпир, гъахьи ачIни?

Агь, му дюн’я – сиф ву, дубкнай гюллйири,
Агь, му дюн’я, адруб уьмур ккунириз,
Агь, му дюн’я – дерин цIа ай дявйирин,
Жегьеннем, кабаб гъапIу юкIвар дадйирин.

Мюрхюн гьарар, ишуранчва, баркавнар?
Ичв гъянаъра айкIан дадйирин юкIвар?

Шюшеханум КЕРИМОВА

****

ЧIуру нивкIуъдира
Ухьуз рябкъюйин,
Му кьюб гьюкуматдин
Арйир чIур шули?
Алаъну пну
Пис хуйири НАТО-йин,
Ихь гъуншйирин кIулар
ИлтIикIур кIури?
Фуну халкьдиз уж’ вал
ГъапIну НАТО-йи?
Фуну пIипIнаъ ктIубшвну
ЦIа убгурайи?
Гъяъри, хъуржри,
Сар-cap’ин алаури,
ЖарадартIан заандар
Вуча, кIури…
Ислягь халкьар
Гъагъи гьялнаъра ирчри,
А дюн’яйин
Аьгьвалатра бикьури…
Фила-вуш гъибди
Дурарин кIул’ина
Харжиб вари,
Чпи жарадариз гъапIу,
ГьубкIди ухьуз
Гъийин женгнаъ кьувватра,
Гъярай гьядисйириин
НукьтIа дивну,
ЧIуруб вари
Дюн’яйилан терг апIуз,
Ислягьвалин пайдагъра
Зади бисуз.

Эскрарикан фикрар

ИлтIикIури, ялхъвниъ арагънайиси,
Йифун цIирикIвар а курсри унчIварик.
Шад шулира амдарза улихьганси,
Женгнаъ айи эскрар айиз фикрариъ.

Эскрар, гъушу хул’ан, гъитну хизанар,
Дупну «сагъул», аъну дадйирра хабаъ.
Жигьил баяр, «Кьяляхъ гъюрча» гъапидар,
Инсафсузваликан адрудар хабар…
Уьлихъ деънайганна кIваина хурза,
– АйкIан гашди, даршиш аргъури айкIан…
Мани атIнар солдтариз урхураза,
– Аллагьди уьрхричву! – кIурира кIваан…

Йигъар, вазар… Гъябгъюра шубудпи йис,
ДикIурай цIарар эскрарикан вуйиз.
КкудукIури адар женгар ккергънайи,
Вушра, умуд дубгрира гъи адариз.

Йикьрар’инди ккудукIрудар ву дявйир,
ЧIяаьн дарин писвалин тумар урзуб?
Дубгри ихь уьмриан му гафра хяви,
Гьар вахтна кIул`ин аку ригъра гъубзуз.

Эльмира АЬШУРБЕГОВА

Дадйир

Кьаби дархьи гъузрин бейнава дадйир,
Женгар айи йишваъ баяр айидар!
ЦIа кчIибгури, хътакури адар аьдйир,
Дявйирикан дерд ваъ, хайир кайидар.

ГъапIу хураг ицци шулин дадайиз –
Дугъан фикрар ярхла чюлиъ лицура:
Фагьмиъ дугъу хураг гъабхура бализ,
Мани хьуз, бал’ин леэф илипура.

Юкьур дявдиъ… Юкьуб ничхриз дубхьна пай
Дадайин юкIв, гьялак гъапIуб хабрари.
Рякъюра дадайиз гагь му, гагь тму бай
Дявдин гюллйирикк дар-дару чIурариъ…

Зийнар духьнайи жигьилариз

Ялхъвниъ айирси жил’ин лицру жигьил,
Жакьвси тIирхрур, ургурихъанди лихрур,
Жвув за апIуз даршули, гъагъиди ил,
Ахниъ арсну рякъюб фици аьгь апIур?!

Жан дадйирин, анжагъ гъузай чIивиди!
Фициб кьаза дюшюш дубхьнашра учвуз,
Багъри ксари вафалувал уьбхиди!
Рякъ бихъиди бедбахтвал’ан удучIвуз!

Яснаъ айи баб-юрд

Тарихарин аьзаб убгънайи баб-юрд,
Гюллйир ккуркIну, кутIуршвну яв швнуб умуд.
Гъарзар вунав гъамнаъ уьлчIюкьнай кIвантIар?
Гъярар вунав дердну дутIуркIнай юкIвар?

Швнуб мичIли жан гъапIунва къаршуламиш,
Зав, пашман уларси, дубхьнаяв дигиш.
Дябкънайи швнур веледдин ифдин лишан
Яв гъамну дарапIди гъузрин перишан!

Ватан, яв юкIв хажалатнаъ учIвура,
Яв нивгъари гъванар-гъарзар урчIвура.
Яв рибчраригъ шид ваъ – рузура нивгъар,
Яв нирари мяъли ваъ – кIура ишлар.

Рамазан РАМАЗАНОВ

Душман дуфна гъапдихъна

Ихь гъунши халкь зулмиъ а гъи, жям’аьтар,
Гъудужвурхьа кюмек тувуз сабхилди,
Ттархьди ухьухь, гьякьвал ккуни миллетар,
Жаваб тувуз нацистариз якьинди.

Гюмихь сабан ижми йикьрар йитIурхьа,
Дяви хулан айитIинди гъидрибтуз.
Саб гъаласи вари уьлке дебккурхьа,
Сяргьятарик душманди зат кудручуз.

Россияйин миллетар ву саб хизан,
Думу сабвал уьбхидихьа гьаргандиз.
Дявди хъапIра ихь гъапйирихъ, кур, изан,
Думу дебккуз дих апIурхьа вардариз.

Му завалиъ йихури а жигьилар,
Ватандихъан жанар дивра дурари.
Уч шулухьа жвуван макан ккунидар,
Пай кивурхьа гъалибвалик гьарсари.
Эскрариз

СВО-йиъ айи баяр,
Ичв гьунар ву душман дерккуб,
Нацистариз дархьи таяр,
Нумунади ляхин апIуб.

Ихь Ватандин сяргьятарихъ
Душмандин лик гьич дарибшри!
Хъипай гьарай мугъарайихъ,
Нацистариз аьгъю ибшри!

Гьарсаб гъулаъ ва гьар хулаъ
Учву кIваин уьрхюри а.
Убгура юкIв бабан гьянаъ,
Балхъан дюаь апIури а.

Му месэла дивна вахтну,
Нацизм Жиллан терг апIинай!
Урусат мюгькамди дюбхну,
Гъалибвалин пайдагъ дубсай!

Аьбдурягьим АЬБДУРЯГЬМАНОВ

****

Ягъур ибшри, гъарах, йиз бай!
Игитриси хлиъ бис яракь!
Ихь Ватандин дихназ йип гьай,
Азад апIин зулмикк ккай халкь!

ЮкIв дадайин вуйиз назук,
Зяиф махьан душмнин улихь!
Пис касарин мапIан язухъ,
Алчагърихьан уьбх Ватан ихь!

Дюн’я ибшри хъана ислягь!
Абйир-бабар шлуганси шад.
Гъач, дадайин, сагъди кьяляхъ,
Гъалибвалин гъадабгъну ад!

Жабир МЯГЬЯМЕДОВ
(СВО-йиъ aйи жигьил шаир)

****

Духьну эскер, алабхьну чру палат,
КIул’ин бисну багъри халкьдин аманат,
Гъахьир вуза читин женгариъ гъалхан,
Душмнарихьан уьбхюз ихь гюзел Ватан.

Уьбхюрача душмнарихьан ихь Ватан,
Багъри ругар гьарсар эскриз ву дарман,
Фукьан учIвру зийнарра апIурча аьгь,
Аьхиризкьан уьбхюруча намус-ягь!

Рякъюрачуз нивкIарик багъри гъулар,
ВартIан ширин, вартIан аьзиз вуй хулар.
Икриъ – аба, хулаъ – баб вартIан уччвур,
КIвантIариин сессузди ал балин ччвур.

Умуд уьбхяй, учвуз вуча вафалу,
Асккан апIуз хьибдар ихь Ватан адлу!
Ич йирфарихъ баруси хъа игит халкь,
Кьувват туври хилариз, биснай яракь.

Ватанпервер баяр ишри хъана бул!
Миллетарик кярхюб апIдарча кьабул!
Женгнаъ учIвуз гьязур ву гьарсар живан,
Гъит дурари апIри душмнарин диван!

* * *

Дявдин рякъюъ дустар маган,
Женгариъ ву дуствал читин.
Гюллейи яв дуст кадагъган,
Наан аьзаб апIурва жин.

Дявдин рякъюъ маган дустар.
Дуст агиди уьмри увуз,
Читинвалиъ шлур яракар,
Гюллдикк ккучIврур уву уьрхюз.

Дявдин рякъяр, дявдин дустар!
Мигъитанай зийнар кIваин!
Учву хъмиди, душмнин пайдгъар
Хъугъайки, за хьидар ухь’ин!