Зубайдат Шябанова

Дагъустан Республикайин муниципальный районарин арайиъ конкуренция артмиш апIбаъ кюмек тувбан ва инвестицйир жалб апIру мублагъ шараитар арайиз хпан цирклариан 2024-пи йисан ерли самоуправленйири гъубху ляхнин натижйириинди, Табасаран районди сабпи йишв гъазанмиш гъапIну.

 

Шагьрарин арайиъ му рейтингдиан сабпи йишваз Дербент шагьур лайикьлу гъабхьну.
«Му месэлйириан ич администрацияйи гъабхурайи ляхин мянфяаьтлуб гьисаб дапIну, заан кьимат тувувалиин шад вуза. Му учу экономикайин цирклин месэлйир ачухъди тартиб ва дурар кьатI’иди гьял апIурайи ляхнин натижа ву.
Му терефнаан райондин артмиш’валик чпин пай кивуб, чпин фирмйир райондиъ налогарин гьисабнаъ тIауб, лихру йишвар арайиз хуб метлеб ади, Табасаран райондиан жара йишвариз кюч духьнайи ва гьадушвариъ бизнес гъабхурайи ватандашарихъди ляхин гъабхувал ккабалгурача.

Гьацира ерли алверчйирихъди аьлакьйир мюгькам дапIнача. Райондин администрацияйиъ дурарихъди кми-кмиди гюрюшмиш шулача, ва дурари сюгьбат гъабхру вахтна чпиз алахьурайи месэлйир ачухъ апIуру. Ич терефнаан дурар гьял апIру рякъяр агурча», – гъапнийи Табасаран райондин глава Мягьямед Къурбановди.
КIваин апIуз ккундучуз, му рейтингдиъ Табасаран районди заан йишвар гъадагъури швнуд-сад йис ву. 2022-пи йисандин натижйирииндира Табасаран райондиз 1-пи йишв тувнийи.