Наргиз Гюлечова
18-пи мартди Мягьячгъалайин «Султандин дарамат» кIуру серенжемар гъахру банкетный залиъ хусуси метлеб айи дявдин операцияйиъ чпин жанар туву эскрарин хизанариз ва сагъ апIуз даршлу уьзрар кайи бицIидарин дадйириз дих дапIну, ушв гьибтбан серенжем кIули гъубхну. Дина 700-тIан артухъ касар ушв гьибтуз дуфнайи.
Серенжем тешкил гъапIур «Дианайихъди кюмек апIинай» проектдин ва «Дагълу дишагьлийир» фонднан кIулиъ айи Диана Уьсманова вуйи. Ихь ватанагьли шуру му жюрейин рягьимлувайин мяракйир гьар йисан кIули гъахура. Къайд дапIну ккундуки, му ражари тешкил гъапIу серенжем, варитIан аьхюб ву пуз шулу. Дианайи чав бабкан гъахьи йигъан, гьаму кьадар инсанариз гьиври-гьадабгъури, дурар рази ктауб чав чаз гъапIу варитIан аьхю пешкешси гьисаб апIура.
Хъа сабсана дарпиди гъибтуз шулдар: серенжемдиъ тупут ипбан жюрейиинди уч духьнайидарин арайиан сар сагъ апIуз даршлу уьзур кайи веледдин дадайиз гьяждиз (Уьмрайиз) путевкара багъиш гъапIну.
Серенжемдиз дуфнайи касарин арайиъ хусуси метлеб айи дявдин операцияйин иштиракчйирикан сарпи Урусатдин Игит гъахьи Нурмягьямед Гьяжимягьямедовдин дада Сапижат Мазаева, сарсана Урусатдин Игит Мягьямед Исбакиевдин дада Марина Исбакиева ва хайлин жара эскрарин дадйирра айи.
Хусуси метлеб айи дявдин операцияйиъ чан жан туву Завурбег Аьгьмедхановдин дада Загьидат Аьгьмедхановайи гъапиганси, мицдар мяракйириъ сабсиб дерд кIваъ айи дишагьлийир уч духьну, сар-сарихъди гаф-чIал гъапIиган, дердлу юкIв цIибди вушра ачухъ шулу. Дугъу чан ва вари уч духьнайидарин терефнаан тешкилатчйиризра чухсагъул гъапну.
Серенжемдин гьякьнаан «Табасарандин нурар» газатдиз Диана Уьсмановайи туву мялуматариинди, дугъан му мяракайихьна гьязур шули хайлин йигъар гъушнийи.
«ИкибаштIан, узхьан сарихьан мукьан халкь уч дапIну, аьхю мярака кIулиз адабгъуз шлуб дар. РД-йин Халкьдин Собраниейин депутат Расим Гьяжиагъаевра улихь хьади узуз кюмек гъапIу вари меценатариз чухсагъул кIураза. Хусуси метлеб айи дявдин операцияйин иштиракчйирин хизанариз ушв гьибтбан серенжем тешкил апIури, цци кьюбпи йис вуйиз. Дицдар хизанар гъи мина уч апIбаз «Кьувват сабвалиъ а» ДРОО-йин председатель ПатIимат Пайзулаевайизра аьхю чухсагъул. Гьамусдихъантинара му жюрейин серенжемар сатIиди гъахуз планариъ айич», – аьлава гъапIну Диана Уьсмановайи.
