Наргиз Гюлечова
Хьадукран вазар ккергъубси, яркврариъ цIа кабхъбан мумкинвалар арайиз гъюра. Мициб хатIалувал иллагьки Нугъай, Къизлар, Хасавюрт, Къарабудагъкент, Гъяякент, Табасаран, Дербент, Сергогъала, Мягьярамкент ва Хив районарин ва Мягьячгъала шагьрин яркврарин фондарин аьтрафариъ ади шулу.
Гьамусяаьт гьавйир ужудар духьну хутIлариъ хьадукран ляхнар гъахурайи агьалйирихьна РД-йин ярквран мяишатдин комитетдин кIулиъ айи Вагьаб Аьбдулгьямидов илтIикIну. Дугъу агьалйирикан, хутIлариъ укI-кьал убгруган, цIихъди ихтият хьуб ккун гъапIну.
«Мисал вуди кIураза, улихьна йигъари Агьцигь райондин Хрюгъ гъулан багарихь яркврарик цIа кабхъну. ЦIа кабхъувал агьалйирин ихтиятсузвалиан арайиз гъафиб ву.
Гьар йисан республикайин ярквран фонднан атрафариин саки 200-дихьнакьан цIа кабхъувалар арайиз гъюра. Яркврарик цIа кабхъбан асас тахсиркрар инсанар ву. Гьаддиз, гьар касдикан ккун апIурза, гъуларин, яркрарин багарихь укIак, кIажук цIа кипбахьан ихтиятди гъузай. Кипу цIа ктIубшвайизкьан гъаравлиъ гъузуб чарасуз ву», – гъапну Вагьаб Аьбдулгьямидовди.
Къайд апIурхьа, Агьцигь райондиъ цIа 15-пи мартди кабхъуб ву. 25-тIан артухъ гектарин яркврариъ кабхънайи му цIа ктIубшвбан серенжемариъ 122 кас ва саб Ми-8 вертолет иштирак шула. ЦIихъди аьлакьалу вуйи читин аьгьвалат айи йишвахьна цIа ктIубшвру техника рубкьуз даршулайивалиан, цIиз аькси вуйи серенжемар 19-пи мартдизкьан гъахури имийи.
Гьаму йигъарин арайиъ яркур убгурайивалиан, саб Агьцигь райондин агьлйирин ваъ, хъа вари дагъустанлуйирин кIвак аьзият кади гъахьнийи. Мидин гьякьнаан республикайин Глава Сергей Меликовдира чан фикрар ачухъ гъапIну
«Хрюгъ гъулан яркур Дагъустандин табиаьтдин девлетарикан саб ву, ва, вари дагълуйиринси, йизра дидин гележегдихъан хажалат зигураза. Гьяйифки, ярквран саб пайназ аьхю зарар гъабхьну.
Агьцигь райондиъси, магьа гьаму йигъари Сергогъала райондин Ванашимахи гъулахъ хъайи ярквракра цIа кабхъну. Мушваъ кабхънайи цIикан гъулаз ва гъулан жямяаьтдиз хатIа ади гъабхьну. Гьаддиз дишлади цIиз аькси серенжемар духну, ктIубшвну.
Му жюрейин дюшюшар арайиз дяргъбан бадали, варитIан мянфяаьтлу ва лазим вуйи ляхин агьалйир вахтниинди гъаврикк ккауб ву. Нубатнан ражари дагъустанлуйирихьна илтIикIну, дурарикан ккун апIураза: гъеебццу укI-кьал ичв гюзчиваликк ккадарди убгуз мигъитанай. Эгер гьадму бицIи цIикан цIюмгъял вушра, жара йишвахьинди микIлу гъубхиш, ихь табиаьтдиз фициб зарар шулуш, фикри ади гъибтай», – гъапну Сергей Меликовди.
