2020-пи йисан 20-пи февралиъ Табасаран райондин культурайин Хулаъ МутIалиб Митаровдин 100 йис хьпаз тялукь вуйи серенжем гъабхьну. Душваъ культурайинна библиотекйирин гъуллугъчйири музыкайинна литературайин композиция улупну.
Серенжем райондин библиотекйирин директор Рафик Аьлиевди ачмиш гъапIнийи. Дугъу, МутIалиб Митаров табасаран литературайин диб дивбаъ, думу артмиш апIбаъ хайлин зегьмет гъизигу шаирарикан сар вуйиб къайд гъапIнийи. МутIалиб Митаров 1920-пи йисан Хив райондин Гъвандикк гъулаъ бабкан гъахьну. Дугъан абйир-бабар чпин баяр-шубар абурлуди, зегьметнахъ юкIв хъади вердиш апIбаз гизаф фикир туврударикан вуйи.
Литературайин рякъюъ МутIалиб Митаров 1937-пи йисан учIвну кIури шулу. Амма дугъан яратмиш апIбан рякъ ухдитIан ккебгънайи. 1937-пи йисан шаирин сабпи «Вари выборариз» кIуру шиир райондин газатдиъ чап гъапIнийи»», — ктибтнийи Рафик Аьлиевди.
Чан удучIвну улхбаъ райондин библиотекайин методикайин отделин заведующий Расмия Рягьимовайи МутIалиб Митаровдин поэзияйин яратмиш апIбарикан яркьуди ктибтнийи. Дугъу мялум гъапIганси, МутIалиб Митаров чан уьмриъ жюрбежюр кеспйирихъди таниш вуйивали ва саб кьадар гъуллугъариъ лихури хьували дугъан яратмиш апIбариз аьхю тясир гъапIну. Миди дугъаз социалист деврин яшайишдиъ шлу хъуркьувалар, гьяракатар, гьелелиг ккудубкIну адру кюгьнейинубдинна цIийибдин женг фици гъябгъюраш, дагълу цIийи инсандин хасият фици артмиш шулаш ва жара уьмрин терефар аьгъю апIбаз зурба мумкинвалар ачмиш апIуру.
«МутIалиб Митаровди чан яратмиш апIбариъ ихь халкьдин тарихдин гьядисйириз гизаф фикир тувра. Дагъустандин халкьари кюгьне заманйириъ чапхунчйирихъди гъахури гъахьи дявйириъ фици чпин уьлкейин азадвал уьбхюри гъабхьнуш улупувал лап асас месэласи гьисаб апIура. Му кьастар шаири «Иран Хараб», «Ифдин гъарзар» ва жара гьамцдар чIатху поэмйир дикIбиинди арайиз адагъуру. Табасаран театри «Иран Хараб» кIуру спектакль сягьнайиинра дивну.
МутIалиб Митаров табасаран литературайиз цIийи темйир гъахи шаирсира тафавутлу ву. Дугъу 1965-пи йисан гъибикIу «Бавтугъай» кIуру поэма Чирюртдин ГЭС диву жигьилариз бахш дапIна. Дидиъ рабочий классдин вакилари зегьметнан фицдар гьунарар улупури гъахьнуш ва рабочйирин коллективдиъ совет инсандиз хас вуйи тербия фици тувраш, мялум апIура.
1970-пи йисан чапдиан удубчIву «Уьмрин пайдагъ» кIуру китаб ва 1973-пи йисан удубчIву «Поэмйир» ччвур али китаб МутIалиб Митаровдин яратмиш апIбаъ варитIан аьхю хъуркьувалси гьисаб апIуз шулу, — къайд гъапIн Расмия Рягьимовайи.
Музыкайин ва литературайин композицияйиъ иштирак гъахьи «Юлдаш» ЦО-йиъ урхурайи: Луиза Рягьимовайи, Аьлим Наврузбеговди, Хадижа Юнусовайи, Тамила Аслановайи, Алина Рашидовайи МутIалиб Митаровдин шиърар гъурхнийи. Гьацира му серенжемдиъ райондин культурайин хулаъ лихурайи артистар вуйи Закарья Амирбеговди, Низакет Аьбдуселимовайи ва Рустам Рамазановди МутIалиб Митаровдин шиърариан мяълийир гъапIнийи. Серенжем кIули гъубхур агьалйирин игьтияжариз гъуллугъ апIру отделин заведующий Валида Агъасиева вуйи.
Серенжемдин аьхириъ дидиъ иштирак гъахьи бицIидар пешкешарихъди ва грамотйирихъди лишанлу гъапIнийи.
