Айгуль Мягьяммедова
25-пи мартдин ригъ али йигъ Мягьячгъалайиъ пашман хабрарилан ккебгънийи. Редукторный поселокдиъ ерлешмиш дубхьнайи «Газатаринна журналарин чапханайин» багахь, гьюлин гъирагъдихьан ярхла дарди Гапцахская кючейиъ айи гизаф квартирйир ккайи хулариъ сяаьт урчIвбари тIубкIувалин сес гъабхьнийи. Сифте варидарин газдин баллон гъутIубкIну кIури, хиял гъабхьну, хъа цIиб кьанди мялум гъабхьиганси, хулаз газ зигури, расвалин ляхнар гъахуради, йишвандин арайиъ хъяркьну адру турбйириан газ удубчIвну, газди хал абцIнади гъабхьну. ГвачIнинган хулаз гъафи эйси дишагьлийи акв кабхьиган, газди чан кьувват улупну. 16 мертебайин хулариъ айи квартирайик цIа кабхъну, убгуз хъюбгъну. Дишлади мина цIа ктIубшвру машинар, гьяракатниинди медицинайин кюмек тувру пишекрар хъуркьнийи.
Хулан эйси дишагьли гъагъи гьялнаъди больницайиъ а. Дугъан жандин 60 процент кьюбпи ва шубубпи дережайин гъургу зийнари алабцIна. Дишагьли убгурайи хул’ан адагъу жили жвувазра гъургу зийнар гъахьну. Думу Мягьячгъалайин Вишневскийин ччвурнахъ хъайи больницайиъ ккаъна. Духтрари дурар сагъ апIуз чпихьан удукьру вари кюмекар тувра. Хулариан 150 кас жара йишвариз адаънийи.
ТIубкIувалин кьувват гьадмукьан аьхюб вуйики, багарихь ерлешмиш духьнайи гизаф квартирйир айи хуларин унчIварин шюшйир гъютIурччвну. Шюшйир хуларин багахь дерккнайи машинариинди ахьну. Натижайиъ, 50-тIан артухъ машинариз зарар дубхьна.
Гъабхьи дюшюш къанун уьбхру гъуллугъари гюзчиваликкна гъадабгъну. Гьамусяаьт дурари, тIубкIувал арайиз гъюбан себебар аьгъю апIури, силисар гъахура.
Гъунши хулариъ айидарин заправка гъутIубкIнушул кIури, хиял гъабхьну. «Ич хуларихьан ярхла дарди машинарихъ бензин ва газ хъубзру кьюб станция ерлешмиш духьна. Гъи гвачIнинган ич хулар, жилар тIурччвруганси, гъиришвнийи. Гьадмуган, заправка гъутIубкIнушул кIури, фикир гъабхьнийиз», – ктибтура гъунши хулариъ яшамиш шулайи дишагьлийи.
Хулариъ тIубкIувал дубхьну саб сяаьт хьайизра, сабсана пашман хабар хъубкьнийи. Имам Шамилин ччвурнахъ хъайи кючейиъ, рякъюхъ ерлешмиш дубхьнайи «Салон сотовой связи» тукандиъра тIубкIувал арайиз гъафну. Гьавайиз удубчIву газдик цIа кабхъну. Думу тукандиъ газ ади гъабхьундар, хъа жиликкди гъябгъюрайи газдин турбайиан удубчIвну. Гьаму ражари 4 касдиз зийнар гъабхьну.
Мягьячгъалайин Советский райондин силисар гъахру отдели РФ-дин УК-йин 238-пи маддайиъ (хатIасузвалин тIалабариз жаваб тутрувди гъуллугъар гьуркIбаан инсандин сагъламвализ зарар тувуб) улупнайи тахсиркарвалин лишнар кайивализ дилигну, уголовный дело гъитIибккну.
«Гьамусяаьт уголовный делойиъ улупнайи тахсиркарвал тасдикь апIбахъди аьлакьалу силисар гъахура», – мялумат тувра Силисчивалин комитетдиан.
ГъитIибккнайи уголовный делойиан гъахурайи силисар республикайин прокуратурайи гюзчиваликкна гъадабгъна.
Дюшюш гъабхьи йишв’ина республикайин Глава Сергей Меликов гъафну. Дугъу зарар гъабхьи инсанар вахтназди жара хулариз адаъбакан, дурариз кюмек тувбакан гъапнийи. «Ихь варитIан аьхю гъалатI къанунсузди тикмиш дапIнайи хулариъ чпин айина адру кепккар тувну масу гъадагънайи хулариъ инсанар яшамиш хьуз гъитуб ву. Гьамус улихь гьамциб месэла дийибгъна: хулариан инсанар адаъну, хулар даргъуб, ясана гьадму хулариъ хатIасузди яшамиш хьуз мумкинвал тувру шартIар арайиз хуб», – гъапну Меликовди.
Тикилишчивалин компанияйин кIулиъ айи Мягьяммед Мягьяммадов инсанарин вижнасузвалиин мюгьтал духьна. Дугъан гафариинди, дагъустанлуйир газдин хатIалувалин бегьем гъавриъ духьнадар. «Учу газ айи хулар рас апIруган, газ удубчIвбаз аькси приборар дивурча. Дурар ниъ ва манишин улупру редукторар ву. Квартирайиз гъюрайи турба хъябкьру приборарра а. Дурар дивбаз 60 агъзур манаттIан харж шулдар. Хъа инсанариз пул тувуз ккундар. Дурарин фикриинди, авария дархьбан бадали, шланг ва кран чIяаьн шулу», – кIура Мягьяммедовди.
ХатIалу тIуркIувалар хьпан кьяляхъ коммуналин гъуллугъарихьна, гьюкмин кIулиъ айидарихьна ва жавабдар касарихьна хайлин суалар арайиз гъюра. Аьхиримжи 2-3 йисандин арайиъ ихь республикайиъ газ тIубкIбахъди аьлакьалу кIваин алдру швнуб бала арайиз гъафнушра, дидкан дарс гъадабгъуз ккунидар адар. Гьелбетда, газдин хатIасузвал тямин апIуз гьюкумат буржлу ву, гьюкуматдин газ зигбан къайдйирра а. Хъа думу къайдйир чIур апIрудар ухьу, – инсанар, вухьа. Ухьуз гьаму кьадар рягьятвалар тувру мутму хатIалуб вуйивал кIваълан гьапIрахьа.
Гьюрматлу ватанагьлийир! Газдин хатIалу пичар хулариъ мидиванай. Хулаъ газдин ниъ аш, дишлади душв’ан удучIвну, кюмек тувру гъуллугъариз дих апIинай. Эгер хулаъ даахнайидар аш, гьяракат дапIну, унчIвар, раккнар ачмиш апIинай. Хулаъ айидар адаури кьан мапIанай, газдин ниъру дишлади инсан амриан гъягъюз гъитру. Хулаъ акв макабхьанай. Улариз зат дярябкъру цIюмгълианра газдик цIа кабхъру. Гъачай, инсанар, газдихъди зарафатар дерккурхьа!
