Наргиз Гюлечова
18-пи апрелиъ Дагъустандиъ «Урусатдиъ ляхин. Мумкинваларин вахт» ччвур тувнайи Вариурусатдин ляхин абгбан ярмарка кIули гъябгъиди. Мидин гьякьнаан улихьна йигъари республикайин зегьметнанна яшайишдин артмиш’валин министрин заместитель Жабраил Жабраиловди ва министерствойин гъуллугъчи Межид Аьлиевди мялуматар тувну.
Жабраил Жабраиловди къайд гъапIганси, му ярмарка гьар йисан кьюб пайнаъди кIули гъябгъюрайиб ву. Региондин дережайиъди вуйи пай 18-пи апрелиъ республикайин муниципалитетарин 47 майдандиин гъябгъиди. Лап яркьуди ярмарка Дербентдиъ ва Хасавюртдиъ, хъа асас серенжемар Мягьячгъалайиъ Гъумугъарин театриъ кIули гъягъиди. Хъа федеральный этап 27-пи июндиъ гъабхуз планламиш дапIна, думу ярмака онлайн жюрейиинди гъябгъиди.
«Му ярмарка Дагъустандиъ кIули гъябгъюри цци 3-пи йис ву. Бикар касар ляхнихъди тямин апIрударси, ярмаркайиъ чпиз лихру йишвар агру агьалйирра иштирак хьиди. Гьаци, тялукь гьисабнаъ айи бикарариз, мектебариъ урхурайидариз, вузаринна ссузарин выпускникариз ва гьацира ляхин абгурайи веледарин абйир-бабариз иштирак хьуз мумкинвал а», – гъапну Ж. Жабраиловди.
РД-йин зегьметнанна яшайишдин артмиш’валин министрин заместители мялум гъапIганси, му ражари ярмаркайиъ Урусатдин цIийи регионариъ айи ляхнин йишварра улупиди.
«Думу регионарихъди, янаки гьадушвариъ бикарар гьисабназ гъадагъру центрарихъди учу гьаммишан аьлакьайиъ ача. Эгер гьадина ляхин апIуз гъягъюз ккуни кас аш вая ихь региондиан ляхин апIру касар агурайи карханйир аш, учу дурарихъди регионарин арайиъ вуйи йикьрар йитIурача», – гъапну Ж. Жабраиловди.
РД-йин зегьметнанна яшайишдин артмиш’валин министерствойин ляхин туврударихъди аьлакьйир уьрхру отделин кIулиъ айи Межид Аьлиевди туву мялуматариинди, ярмаркайиъ оборонайин промышленностдин, гъулан мяишатдин, ариш-веришчивалин, жямяаьтлугъ ипIру-убхъру карханйирра иштирак хьуз планариъ а.
«Пуз ккундузузки, му йигъан ярмаркайиъ онлайн жюрейииндира Дагъустандиъ айи 3 агъзур лихрудариз вуйи йишвар ва 10 агъзур вари уьлкейин лихрудариз вуйи йишвар улупиди. Ярмаркайин гьарсар иштиракчийиз, «Урусатдиъ ляхин» порталиъ учIвну, чаз ккуни ляхин ктабгъуз мумкинвал хьибди.
Мисал вуди гъадабгъиш, ккудубшу йисан республикайин дережайиъди кIули гъубшу ярмаркайиъ ляхнихъди тямин апIру 500 касар иштирак гъахьнийи. Гьадрарикан 100-тIан артухъ касариз чпин карханйириъ ляхин апIрудар гъидихъну.
Хъа бикарарин гьякьнаан кIуруш, сачдин ярмаркайиъ ляхин абгури иштирак гъахьидарикан 1800 кас ляхнихъди тямин гъапIну. Гьадрарикан 500 кас ихь республикайиъ», — гъапну Межид Аьлиевди.
