Зубайдат Шябанова
Цци кьюб вазлин арайиъ Урусатдин МВД-йин Мягьячгъала шагьрин транспортдин цирклин линейный управлениейин гъуллугъчйири 69 тахсиркарвалин дюшюшар ашкар гъапIну. Дурарикан 49 тахсиркарвал наркотикар тарагъбахъди, 4-къанунсузди яракь масу тувбахъди ва 3 – лутивалихъди аьлакьалу ву.
Му мялуматар ич сюгьбатнаъ Урусатдин МВД-йин транспортдин цирклин Мягьячгъала шагьрин линейный управлениейин начальникдин заместитель, ихь ватанагьли Рустам Гьяжиевди тувнийи. Дугъу гьацира транспортдин полицияйин улихь дийигънайи месэлйирикан ва дурар гьял апIурайи рякъярикан ктибтну.
Урусатдин МВД-йин Мягьячгъала шагьрин линейный управлениейин дахилнаъ Дербент, Хасавюрт, Къизлар шагьрарин станцйириъ ва Мягьячгъалайин аэропортдиъ ерлешмиш духьнайи полицияйин линейный 4 отдел а. Артезиан, Самур, Къизилюрт станцйириъ ва Мягьячгъала шагьрин гьюлин ариш-вериш гъабхру портдиъ айи полицияйин 4 линейный пунктарра думу отделарин гьисабнаъ айидар ву. Мягьячгъала шагьрин линейный управлениейи 600-тIан артухъ километр рукьан рякъяриин гъайгъударвал гъабхура. Дурарин асас вазифа гьавайин ва рукьан рякъярин транспортдиъ айи жямяаьтлугъдин низам-къайда ва хатIасузвал тямин апIуб, агьалйирин мутму ва гъагъ уьбхюб ву.
«Транспортдиъ шулайи бедбахтваларин дюшюшари учук гъалабулугъ кипра. Лазим дару йишварилан рукьан рякълан улдучIвурайи вахтна поездарикк инсанар ккахьувалин дюшюшар йислан-йисаз артухъ шула. Рукьан рякъярин багарихь хьайи мектебариъ урхурайи баяр-шубарихъди, кми-кмиди гюрюшмиш шули, ич инспекторари хатIасузвал уьбхбаан лекцйир гъахуру.
Аьхиримжи вахтна депойин паркариъ дерккнайи вагъунариин улучIвури шиклар йивуз ккунидарихъди аьлакьалу месэлара учIрударикан саб гъабхьну. Амси йигъан инсандиз 2 метр манзилназ вагъундин зиин али электрик симариан 36 агъзур вольт тук йивруваликан хабар адар. Мициб кьадарнаъди тук гъиву вахтна, инсандикан фу шулуш, фикир апIураданчва?!
Гьацира рукьан рякъярин багарихь эйси хъадарди деетнайи мал-къарайира хатIавалар арайиз хура. Маларихъди аьлакьалу вуди шулайи аварйири рукьан рякъяриз хайлин зарар тувра», – ктибтура Рустам Гьяжиевди.
Пассажирарин арайиъ чIуру кьастар айидар, тахсиркарвалар апIурайидар фици агуруш ктибтури дугъу къайд гъапIганси, линейный управлениейин ППС-дин ротайин вакилари пассажирар гъахру вари поездариъ республикайин кафари сяргьятар ккудукIурайи йишв’ина рукьайиз хатIасузвал тямин апIбахъан жавабдарвал гъабхура. Мисалназ, Мягьячгъалайиан Артезиан станцияйизкьан. Душваъ дурари поезддин гюзчивал ва жавабдарвал гъабхбан вазифйир Астрахандин линейный управлениейин вакиларихьна тувра. Поезддиъди гъягъюри гюзчивал гъабхбалан гъайри, дурари шаклу инсанарин документар ва билет хьадрудар ахтармиш апIуру.
«Аьхиримжи йисари учу поездариъ ва электричкйириъ шулайи тахсиркарвалар цIиб хьуз рякъяр агурача. Гъубшу йисан Мягьячгъала шагьрин линейный управлениейин вакилари 327 тахсиркарвал гьисабназ гъадагъну. Дурарикан 216 къанунсузди наркотикар ва 18 яракь масу тувбахъди, 22 тахсиркарвал икI апIувалихъди аьлакьалудар вуйи.
Гьисабназ гъадагъурайи тахсиркарвалариан рябкъюрайиганси, варитIан гизафси дицдар дюшюшар къанунсузди наркотикарин сурсатар тарагъурайивалиан шула. Мисалназ, цци 21-пи январи Къизлар шагьрин ЛОП-дин дежурный частназ пассажирар гъахру 86-пи нумрайин «Москва–Махачкала» поезддиъ гюзчивал гъабхру полицияйин дестейин вакили наркотикар хьайи кас ашкар гъапIбакан хабар дебккну. ВуйиштIан, Таджикистан Республикайиан вуйи сар касди Дагъустандиз наркотикар хурайи. Линейный управлениейин полицияйин гъуллугъчйири думу кас деънайи йишв ахтармиш гъапIу вахтна, марфкIин халиъ кIару парчайигъ гъитIну, зиълан скотчди ижми дапIнайи кьюб багълама гъидихъну. Сабдиъ 139, тмунубдиъ 130 бицIи багъламйир айи. Дурариъ лизи рангнан хюсиб мутму абхьнайи. Экспертари думу «мефедрон» наркотик вуйиб тасдикь гъапIну. Думу касдиина РФ-дин УК-йин 228-пи маддайиан уголовный дело гъитIибкIну.
Контрабандайикан улхури, улихьна йисари ич линейный управлениейин гъуллугъчйири республикайиз кIару рынокдин кьиматариан саки саб миллион долларин кьиматназ вуйи папрусар ихтияр адарди хурайи дюшюш ашкар апIбакан ктибтуз ккундузуз. Кьюб аьхю кьадар гъагъ гъабхру фура машинариъ 1,7 миллион пачка акцизный маркйир алдру, Арменияйиъ гьязур гъапIу папрусар хуради гъахьну. Думу гъагъ шил дибрихърубси дубгбан бадали, Урусатдин жара регионаризди дубшну ккундийи. Гъагъ айи машинар саб нукьтIакьан шак дяргъруганси таможенный гюзчиваликкан ккудучIвну гъягъюрайи. Учук саб фти-вуш сикинсузвал кипнийи, ва учу дурар документар ахтармиш апIуз дерккунча. Думу гъагъдин документар къалп жюрейиндар вуйи. Гъагъдиин арест иливну. Эйси фуж вуш, гъира мялум дубхьнадар. Кагъзариъ улупнайи фирмйирра кучIлиндар гъахьну. Гъагъ хътапIдар Арменияйин вакилар ву, дурар чпи уголовный жавабдарвалихъна хруб аьгъяди, Урусатдиз гъюрадар», – ктибтура Рустам Гьяжиевди.
Сюгьбатнан аьхириъ Р.Гьяжиевди Урусатдин МВД-йин Мягьячгъалайин линейный управлениейиъ лихуз аьшкь айи Урусат Федерацияйин ватандаш жигьилариз чпихьна гъуллугъназ гъюб теклиф гъапIну. РФ-дин къанундиинди Урусатдин ОВД-йиъ лихурайи гъуллугъчйириз яшайишдин цирклиан хайлин льготйир тувра.
Ляхниъ дийигъбан гьякьнаан Мягьячгъала шагьрин В.Эмировдин кючейин 13-пи дараматдиз илтIикIуз вая 8 (928) 286 26 86 телефондин нумрайиз зенг апIуз шулу.
