Мейлан Нежефов
Гъябгъюрайи йисан ихь халкьди Ватандин Аьхю дяви ккудубкIну, Гъалибвалин 80 йис хьувал къаршуламиш апIиди. Гьяйифки, му гъати дявдиан гъалибвал хьади гъафи эскрарикан Хив ва Табасаран районариъ гъи сарра чIивиди имдар. Амма дурар ихь арайиан гъушнушра, гъийин ихь ислягьвалин йигъ, руг, хал, халкь бадали алдагъу ликар, гъизигу гаш’вал, бахтсузди адау йигъар ва йишвар, чпин жандилан хил алдабгъну, гюллдикк мухур ккивну гъазанмиш гъапIу гъалибвал ухьу кIваълан гьапIиш, дурариз накьвдиъкьан архаинвал даршул. Гьаддиз дурар гьаммишан марцциди фикриъ уьрхюз ухьу буржлу вухьа.
Мидланра савайи, ццийин йис Ватан уьбхрурин йисси тяйин дапIнайивалра гюзет апIури, Хив райондиъ Гъалибвалин йигъандин гъаншариъ яркьуди ватанпервервалин cаб жерге серенжемар кIули гъахура.
Улихьна йигъари машинарин кьялхъян гюзгйирик «Гъалибвалин 80 йис» кIуру мялумат кайи афишйир китIнийи. Мектебариъ Украинайин жилариин гъябгъюрайи хусуси метлеб айи дявдин операцияйиъ жюрэтлувал улупури, Ватан бадали чпин ифи гьяйиф дарапIди, талаф гъахьи игитариз бахш дапIнайи ачухъ дарсар гъахура, дурарин суратар кайи баннерар гьязур апIури, мектебдин гьяятариъ керхра, гъулазди учIврушварихь урсра. Ватандин Аьхю дявдин вахтна далу терефнаъ гъахьи ва гъалибваликк чпин пай киву райондин агьалйирик 80 йис тамам хьпан медалар китIра. Мектебарин, бицIидарин багъарин, гъуларин администрацйирин ва культурайин хуларин улдарик «Ихь Гъалибвал» кIуру темайиан дизигнайи шиклар зигура. Гъуларин ядиграрин багар-гурарихьан зирзибил марцц апIури, дурар таза алаури, расвалин ляхнар кIули гъахура.
Зиихъ гъахурайи серенжемарин гьякьнаан райондин жямяаьтлугъ палатайин председатель Айдабег Мазовди гьамци кIура: – «Гъи хаин душмниз ихь тарих жараси ккитIибкIуз ккунди айиган, алчгъари интернетдин жюрбежюр сайтариан ихь баяр-шубар алдатмиш апIуз кьаст ади ляхин гъабхурайиган, ухьу дурарин пис кьастариз рякъ гьадабтIбан бадали гьамциб чIиви ляхин чарасуз дубхну ккун. Узу умудлу вуза, аргъаж шулайи насларин арайиъ ухьу гьамциб ватанпервервалин рюгь кайи, мяналу, важиблу ляхин гъабхури имбукьан гагьди, душман ухь’ин гъалиб хьидар».
Гъалибвалин 80 йисандин юбилейиз бахш вуйи серенжемарин дахилнаъди улихьна йигъари Мажвгларин гъулаъ Ризван Нежефовдин ччвурнахъ вуйи футболин турнирра кIули гъубхнийи. Турнириъ Мажвгларин ва Асккан Ярккарин мектебариъ 9-11-пи классариъ урхурайи баяр иштирак гъахьну. 3-пи апрелиъ, Ризван ихь арайиъ имийиш, дугъан 43 йис тамам шулийи. Хъа гьяйифки, уьмур дугъан ужудар чагълариъ айи вахтна кьатI гъабхьну. Армияйин кьяляхъ контрактдиинди гъуллугъ гъабхурайи Ризвандиз 2002-пи йисан 25-пи мартдиъ Чечен Республикайин Октябрьский поселокдин багахь гъабхьи дявдин операцияйиъ гъагъи зиян гъабхьну… Думуган дугъан 20 йискьан тамам дубхьнадайи. ЙикIбахъан Ризван Кьягьялвалин ордендиинди лишанлу гъапIну. Игит багъри гъулаъ фаракьат дапIна.
Ризван Нежефов фикриъ уьрхюри тешкил дапIнайи турнириъ Ярккарин командайи сабпи йишв гъадабгънийи. Дурариз футболин туп, кубок, ва 10 агъзур манат пулин пешкеш гъапIнийи. Кьюбпи йишв гъадабгъу Мажвгул гъулан команда 5 агъзур манатдин эйси гъабхьну.
