Зубайдат Шябанова

Гьаму йигъари Табасаран райондин глава Мягьямед Къурбанов хусуси метлеб айи дявдин операцияйиъ кечмиш гъахьи эскрарин абйир-бабарихъди гюрюшмиш гъахьну ва дурарихьна чпин веледарин гьюкуматдин терефнаан вуйи наградйир тувну.

 

Ватанди чпин улихь дивнайи вазифйир тамам апIурайи вахтна кьягьялвал, игитвал ва дирбаш’вал улупу Ярса гъул’ан вуйи старшина Рафим Селимов, ФуркIил гъул’ан вуйи рядовой Аьбдулгьюсей Халибегов, Ягъдигъ гъул’ан вуйи ефрейтор Рамазан Рамазанов, ТIивак гъул’ан вуйи прапорщик Алавудин Шихялиев, Ругуж гъул’ан вуйи Исамудин Гьяжимурадов йикIбан кьяляхъ Кьягьялвалин орденариинди лишанлу гъапIну. Мидланра гъайри, Урусатдин Президент В.Путиндин къарариинди, Хючна гъул’ан вуйи Кьягьялвалин ордендин сагьиб Рафик Исрафиловдиз, кечмиш хьпан кьяляхъ Жуковдин медаль тувну.

«Гъи, гьяйифки, ухьу нубатнан ражари гьюкуматдин наградйир ихь гъийиху эскрариз туврахьа. Ичв кIваъ айи дерд-хажалат саб жюрейин пешкешнахьанра яваш апIуз даршлубдин гъариъ ача. Ихь ватандашари намуслувалиинди ва игитвалиинди Ватандин аьтрафар уьрхюри, чпин жанар фида гъапIну. Учу учвуз башсагълугъвал ккун апIурача. Му ихь варидарин уртахъ дерд ву.

Гьаддихъди сабси, учу ихь игитариинди дамагъ апIурача ва дицисдар кьягьялариз тербия туву учвуз чухсагъул мялум апIурача.
Кечмиш гъахьи игитар ухьхьан кьяляхъ апIуз шулдар, хъа дурарихьна уьмурлуг гьюрмат уьбхюз ухьу буржлу вухьа. Дурарин ччвурар гьякьикьи ватанпересаринси ва кьягьял эскраринси райондин тарихдиъ гьаммишандиз гъузди», – гъапну Мягьямед Къурбановди гъийиху эскрарин багахьлуйирихьна илтIикIури.

Серенжемдин аьхириъ дугъу духьнайидариз райондин администрация гележегдиъра хусуси метлеб айи дявдин операцияйиъ гъийиху эскрарин хизанариз вари терефариан кюмек апIуз гьязур вуйиваликан гъапну.