Зубайдат Шябанова
Гьаму йигъари Мягьячгъала шагьриъ «Саб вуйи Урусат» партияйин штабдиъ «Эскриз кагъаз. БицIидарин инанмиш’вал ва гьюрмат» китабдин презентация гъабхьну.

Китабдиъ «Эскриз кагъаз» акцияйин дахилнаъди республикайин баяр-шубари дявдин женгариъ айи эскврариз гъидикIу кIваз тясир апIру кагъзар чап дапIна. Кагъзарин авторарин арайиъ Табасаран райондин Рушвул гъулан мектебдин, Табасаран райондин гимназияйин ва Хючна гъулан 2-пи нумрайин мектебдин урхурайидарра а.
Китабдин презентацияйиз кагъзарин авторар вуйи чве ва чи, Табасаран райондин Рушвул гъулан мектебдин 9-пи классдиъ урхурайи Гъазиаьли ва 11-пи классдиъ урхурайи ФатIима Гьяжимягьямадовариз теклиф гъапIнийи. Серенжемдиз чан гьадму ученикар хъади райондин образованиейин управлениейин кIулин пишекар Лейла Сефербегова гъафну. Дугъан гафариинди, мектебдиъ дурари кьюриддира ужудар аьгъювалариз урхура.
Китабдин презентацияйин мажлисдиъ гьацира РД-йин Халкьдин Собраниейин председатель Заур Аскендеров, РД-йин Халкьдин Собраниейин председателин заместитель Елена Павлюченко, РД-йин Халкьдин Собраниейин образованиейинна илимдин комитетдин председатель Расим Гьяжиагъаев ва хайлин жарадар иштирак гъахьну.
Фатимайи ва Гьяжиаьлди, кагъзар дикIуз фикир ва кьувват чпиз фти тувраш ва гьарсаб гаф фицдар гьиссариинди бикIури гъахьнуш, ктибтну.
Къайд апIуз ккундузуз, Фатима ва Гьяжиаьли гьадму саб вахтна «Табасарандин нурар» газатдиъ учу чакан макьала чап гъапIу Рушвлан вуйи 97 йис яшариъ айи Хадижат бабан худлар ву.
Ич сюгьбатнаъ Фатимайи гъапиганси, хусуси метлеб айи дявдин операция ккебгъу йигъариланмина башламиш дапIну, Хадижат бабу дявдин женгариъ айи ихь эскрариз сикин дарди атIнар урхура.
«Аьсрарианмина табасаранар чпин игитвалиинди ва ватанпервервалиинди тафавутлу вуйи. Магьа гъира табасарандин игитар, ихь уьлкейин маракьар уьрхюри, абйири туву рюгьнан кьувват зяиф дархьивал субут апIури, миллетчйирихъди гъахурайи женгариъ а. Гъи ич гъулан 35 жигьил бай думу женгариъ иштирак шула. Гьяйифки, хьур эскер кечмиш гъахьну ва кьюр айи йишвкьан агъдарди гъудургну. Гьаддиз узхьанра гъирагъдиъ гъузуз гъабхьундарзухьан ва, гафнан вушра кюмек туври, ихь эскрариз кагъзар дикIуз хъюгъюнза. 2022-пи йисан ич мектебдин мялим Лейла Сефербеговайи эскрариз рягьимлувалин кюмек уч апIбан акция ккебгъган, вари гъуландари думу акцияйиз чпихьан шлу кюмек тувуз хъюгъну. Аьхюдари пул ва ипIру сурсатар хуйи, хъа учу, бицIидари, эскрариз кагъзар гъидикIунча. Гьадму йисхъанмина узу гьар йисан швнуб-саб ражари эскрариз кагъзар хътауб аьдатнаъ ипунза. Йиз фикриан, ич бицIи ляхнари ихь эскрариз аьхю гъалибвал багахь апIуз кьувват тувди», - гъапнийи ич сюгьбатнаъ Фатима Гьяжимягьямадовайи.
Презентацияйин аьхириъ гьарсар иштиракчийиз пешкешар багъиш гъапIну.