Наргиз Гюлечова
Швнуд йис хъади-хъади Сулейман Керимовди касибвал кайи дагъустанлуйириз, гьяждиз гъягъбан бадали, путевкйир тувра. Хъа аьхиримжи шубуд йисан дугъу, касибвал кайидаризси, хусуси метлеб айи дявдин операцияйин иштиракчйиризна дурарин хизанаризра гирами йишвариз гъягъюз кюмек апIура. Цци му жумарт инсанди гьяждиз 5 агъзур путевка жара гъапIну: 2500 путевка – хусуси метлеб айи дявдин операцияйин иштиракчйириз ва дурарин хизанариз, хъа имбуну 2500 – касиб хизанариан вуйи касариз.
Улихьнаси узу ич мирасарихъди деънайи вахтна, Хизри Абакаровди ич эмдин хпириз Сулейман Керимовдихьан гьяждиз гъягъру путевка тувну кIури, гъеебхьунзуз. ИкибаштIан, узу дугъахъди дишлади сюгьбат гъабхуз гьяракат гъапIунза.
Айханум Сефербегова, чан хизан ккебгъхъанмина Мягьячгъалайиъ яшамиш шула. Уьмрин юлдаш Шихмураддихъди дугъу 3 риш тербияламиш гъапIну. Сар швувахь хьа, хъа кьюрсана студентар ву. Мурариз сар хтулра а. Жилир лихури гъахьнушра, Айханум Сефербегова гьич сабанкьан сикинди деъну гъахьир дар, думу гьаммишан кьюб ляхниъ ади гъахьну.
«Зегьметнахьан зат ярхла гъахьи кас дарза. Йигъандин ляхин лап гъагъиб дарухъанмина, йишнура гъилихиш гьапIрухъа кIури, йишвандин вахтна саб сяаьтна гьацIан арайиъ гьаму ич хуларин багарихь хьайи рякъ ичIибкури, магьа хайлин йисар вуйиз. Гьаци, нубатнан ражари ляхниз удучIвнайир вуйза. Му йишвандин ляхин саки ккудубкIну, 10 дакьикьайилан хулаз гъягъюз гьязур шулайи вахтна, гьаму рякъ марцц апIурайи учухьна, камерйирра хьади, сар ришна аьхю яшарин жви гъафнийи. Шубур дишагьли вуйча. Лап яманди гучIра гъабхьунчуз. Хъа дурари учу видеойиз адагъуз хъюгъиган, узуз гучIтIан нач артухъди гъабхьнийиз. Машниин алахьру маскйирра ккудукIну айиз, хъа заказ дапIнайидар хъуркьнура адайи. Машниин маска алийиш, мукьан нач хьибдайи (аьлхъюра). Му жвуву чав Хизри Абакаров вуза гъапнийи, ва гьарурихьан жа-жаради гьяждиз гъушур вуна кIури, гьерхнийи. «Ваъ» кIури жаваб тувиган, дугъу, учвуз Сулейман Керимовди гьяждиз гъягъюз путевкйир тувна, гъапи. ИкибаштIан, цIийина мюгьталра гъахьунза, хъугънура дайза. Сулейман Керимов фуж вуш ва дугъу гьяждиз гъягъюз путевкйир тувра кIури деебхьнайзуз, хъа гьяйифки, Хизри Абакаров фуж вуш, аьгъдайзуз. Аьдати касариз гьапIруб аьгъюшул дицдар касар?!» – гъапнийи йиз мирасли.
Айханум Сефербегова учв марцци юкIв айи кас ву. Узухъди сюгьбатнаъ айи вахтнара дугъан уларилан швнуб-сабан нивгъар гъушнийи. Думу гьамусра чаз Аллагьу Тааьлайи марцци ругариина гъягъюз рякъ ачухъ дапIнайивалихъ хъугънайиганси дар.
«Думу йишван рякъ марцц апIурайи узузра, сар гъумугъ ва сар дарги дишагьлийириз, гьаруриз 5 агъзур манатра тувнийчуз. Гаф-чIал апIбан кьяляхъ ич телефонарин нумрйирра дидикIну, учвуз закур зенг апIиди дупну, гъушнийи. Йишвандин вахтна шагьрин рякъяр марцц апIурайи 1000-тIан артухъ дишагьлийирикан учу гъядягъбиин мюгьталра духьну, гьарур чан хулаз кьяляхъ гъушча. Хулаз гъафири йиз жвувазра му гьядисайикан ктибтунза. Му узухъ хъугънура дайи… Хъа йигъан зенгнан сес-дикIра адайи. Хябяхъ шули, йиз телефондиз шли-вуш зенг апIура.
За дапIну, фуж вува кIури гьерхиган, гьяждин гьякьнаан зенг апIурайидар вуча ва закур яв хулаз гъюз ккундучуз гъапнийи.
Мици гъапиган, жилириз фу пидикIан кIури, хъанара гучI гъабхьунзуз. Узузси, имбуну дишагьлийиризра зенг дапIнайи, ва учу, шубриддира, санурин хулаз уч хьуз йикьрар гъапIунча, фицики яшайиш ичубтIан лап касибвал кайиб ву; белки гьадгъаз хъанара артухъ кюмек апIур кIури, фикир гъабхьнийич. Хъа дуфнайидариз гьарурин хулаз гъягъюз ккун гъабхьнийи. Гъюрударихь учуз лап уччвудар кюкйирин кунцIарра хьайи. Дурар хулариз гъюбан метлеб гьарсар путевка туву касди, камерайиз лигури, Сулейман Керимовдиз чухсагъул пуб вуйи.
Дюзди кIуруш, наанкIа социальный сетариъ гъяркъиш, узуз йиз багахьлуйири, инсанари фу пиди кIури, лап начди вуйзуз. Нач’вал кашра, саб кьюб гаф гъапунза. Хъа гъи думу гафар сабансана текрар апIуз ккундузуз.
Сабпи нубатнаъди чухсагъул кIурза Сулейман Керимовдиз. Гьадму касдин кюмекниинди фукьан касибвал кайи мусурман касариз марцци ругариина гъягъювал кьисмат гъабхьну. Гьадгъахъди сабпи Хизри Абакаровдизра аьхю вуйи чухсагъул. Му кас йишвандин вахтна чан нивкIра кам дапIну учухьна гъафундайиш, шлиз аьгъя, учуз филан гьяждиз гъягъюз амур ва мумкинвал шулийиш. Йа Рабби Йа Аллагь, гъит мицдар касариз ва дурарин хизанариз мюгькам сагъвал, ярхи уьмур туври. Аллагьдин амриинди узу гьяджиз гъушиган, му касарин кIуллан дюаь апIидиза. Гьадарарихъанси, ихь имбуну вари мусурман улматарихъан варидарихъандира», – аьлава гъапIнийи Айханум Сефербеговайи.
Йиз терефнаан узузра пуз ккундузуз, гъит Сулейман Керимовсдар касар Дагъустандиъ артухъ ишри. Хъа гьарсар гьяждиз гъюгъюрайи касдин кIваъ айи вари ужудар ниятар Аллагьди кьабул апIри, дурариз ягъурлу рякъ ибшри.
