Наргиз Гюлечова
Дагъустандиъ айи 5 агъзурихьнакьан хусуси арфарин мяишатари саб йишв’инди гьар йисан 1 агъзуртIан артухъ тонна йиччв гьясил апIура. Саки гьарсаб гъулаъ арфар уьрхюрайи касар а, дурари йиччв, жвуван игьтияжаризси, масу тувузра уч апIура. Асас вуди ухьухь уьрхюрайи арфар «Карника», «Бакфаст» ва «Карпатский» жинснандар ву.
Арфар кьадарсуз хайирлу шей’ар ву, дурари гьясил апIурайи жюрбежюр сурсатар – йиччв, мулах, арфарин агъу ва гь.ж. инсанари хайлин уьзрарихьан вуйи дармнарси дегьзаманайирианмина ишлетмиш апIура.
Мидланра гъайри, арфари гьар-тIулизра, набататчивалин цирклизра гизаф мянфяаьт тувра. Къайд апIуб лазим вуки, йигъандин арайиъ арфарин саб хизандиз 60 миллион кюкйир, дурариин дурсри, тузламиш апIуз мумкинвал а. Гьаци, арфари гъулан мяишатдин багълар тузламиш апIбиинди, туврайи ужуб ерийин бегьер артухъ шула.
Ужур арфархъан хьпан бадали, инсандиз арфарикан гизаф мялуматар ади ккунду. Хъа арфари ерийин йиччв тувбан бадали, арфархъни чан мяишатдиз хъайивал апIури, жюрбежюр профилактикайин серенжемар гъахури арфарик уьзрар каш, сагъ апIури ккунду. Анжагъ гьадмугантIан арфарикан ужуб хайир шулдар.
Гъи арфарин мяишат артмиш апIурайи касариз гьюкуматдин терефнаанра субсидйир жюрейиинди кюмек тувра. Мисалназ, арфарин хизанарна баб-арфар ва гьацира цирклиъ ишлетмиш апIру алатар масу гъадагъуз удучIву харжарин 50% гьюкуматди кьяляхъ тувра. Мура циркил артмиш апIуз ккуни касариз аьхю кюмек ву.
Улихьна йигъари Дагъустандин гьюкуматдин гъулан мяишатдин университетдиъ му цирклин артмиш’вализ бахш дапIнайи форум кIули гъубшну. Форумдиз Дагъустандин арфахънар, Чечен ва ва Беларусь республикйирианра пишекрар дуфнайи. Форумдиъ цирклиъ гъузнайи читин месэлйир гъитIирккнийи. Гьадрарикан варитIан асасуб Кьялан Азияйин гьюкуматариан хурайи жюрбежюр уьзрар кайи арфарин месэла вуйи. Арфар масу гъадагъруган, ихь арфархънари сабпи нубатнаъди кьюрд адапIуз шлу, зегьметкеш жинсариз фикир тувра, хъа гьяйифки, уьзрар думукьан фикриз гъадагъурадар.
Форумдиъ дидин иштиракчйириз арфар нумраламиш апIбан гьякьнаанра мялутар тувнийи, фицики, гъийин йигъан му цирклиъ чарасуз тамам дапIну ккуни ляхнарикан саб ву.
