Мейлан Нежефов
Аьхю Урусатдин фуну юрд гъадабгъишра, душваъ жюрбежюр гъуллугъариъ, ляхнариъ лихурайи табасаран халкьдин зигьимлу, бажаранлу, зегьметкеш вакилар рякъюру.
Чпин пишекарвалин рякъюъ заан хъуркьувалар улупури, ихь халкь адлу апIурайи баяр-шубарихъди фукьан вушра девлетлу вухьа. Дурариинди ихь халкьдихьан дамагъ апIуз шулу.
Гъи газат урхурайидар чан уьмрин мяна илимдиъ рябкъюрайи Юзбег Навалиевдихъди таниш апIурача.
Юзбег 1994-пи йисан 26-пи майдиъ Ставрополь крайиъ Будённовск райондин Архангельское гъулаъ Навалиеварин аьхю хизандиъ бабкан гъахьну. Дугъан кюлфетдин бина Хив райондин Зилдикк гъул’ан ву.
2012-пи йисан Зеленокумск шагьриъ мектеб ккудубкIу жигьил Санкт-Петербург шагьриъ ерлешмиш дубхьнайи академик И.П. Павловдин ччвурнахъ хъайи медицинский университетдин лечебный факультетдик урхуз кучIвру.
Ординатурайиъ дугъу кIванна дамарарин хирургияйин пишекарвалин бедендин табии дару паяриан ва трансплантологияйиан В.И. Шумановдин ччвурнахъ хъайи институтдиъ урхури, ляхнин тажруба гъадабгъну. Хъасин гьадму институтдин кардиохирургияйин отделениейиъ кIван трансплантация апIбаанра аьгъюваларна тажруба гъадабгъну.
2021-пи йисан Юзбег Навалиев А.В.Вишневскийдин ччвурнахъ хъайи хирургияйин НМИЦ-диъ академик Б.Г.Алекяндин регьберваликкди эндоваскулярный хирургияйиан аспирантурайик кучIвру.
Ужудар аьгъювалар гъадагъу ва уьмрин мяна илимдиъ рябкъюрайи ихь ватанагьли гьамусяаьт С.П.Боткиндин ччвурнахъ хъайи многопрофильный илимдинна клиникайин центриъ ифдин дамарарин патологйир сагъ апIури ва инфарктарна инсультар гъахьидариз экстренный кюмек туври, рентгенэндоваскулярный хирургди лихура.
Юзбег Навалиев улихьна йигъари медицинайин илмарин кандидат гъахьну.
«Йиз хъуркьуваларин бина абйир-бабарин тербияйи ккивну. Ихь уьлкейин заан аьгъювалар тувру университетди ва институтди йиз закурин йигъандин ккиришрар ккивну ва жвуван удукьувалариин йиз хъугъвал хьуз гъитну. Гьамдихъди аьлакьалу вуди узуз уьмриъ дюз рякъ бисуз кюмек туву гьарсар касдиз чухсагъул кIураза. Йиз пишекарвалин рякъюъ хъана зурба хъуркьувалар улупуз планламиш дапIназа. Ин ша Аллагь.
Йиз таяриз ва аргъаж шулайи наслариз, чпи фициб пишекарвалин рякъ ктабгъишра, гьадму рякъюъ юкIв хъивну ва кIул ис дапIну, туврайи маважибдиз дилигди, жафа зигуб ккун апIураза. Хъугъай, гьаци гъабхьиш, гьарури чан кIван ужудар мурад-метлебар кIулиз адагъиди ва жвув фуж вуш, жвув’ан фу удукьуруш, гьадмуган мялумра шул. Гьаци намуслувалиинди лихурайи кас ляхнин заан кIакIарихьна рукьиди», – умудлуди кIура ихь ватанагьлийи.
