Гьарсар касдин уьмриъ кьимат дивну ккудубкIуз даршлу, вари дюн’ятIан багьалу шей’ар шулу. Сариз думу ккуни касдин сес ву, тмунуриз – багъри веледдин аьлхъюб, шубурпириз – дадайин мани хилар, бязидариз – бахтнан чIикъри геренар, тмундариз – хусуси азадвал. Гьелбетки, гьарсаб халкьдизра, гьарсаб уьлкейизра дицисдар багьалу гавагьирар а – чпихъ агъзрариинди уьмрар сарф дапIнайи, чиб’инди халкьди дамагъ апIурайи.

Ихь ватанагьлийириз дициб варитIан пак ва багьа шейъ – Ватандин Аьхю дявдиъ гъазанмиш гъапIу Гъалибвал ву. Дидик советарин уьлкейин гьарсар къанажагълу касди чан пай кивну: эскрари – женгариъ ифйир удурзури ва уьмрар сарф апIури, далу терефнаъ ислягь дишагьлийири, кьабидари, бициIидари – хутIлариъ, заводариъ, идарйириъ, бегьемди дирипIди, йишвну даърахди, фронтдиз кюмек туври, медицинайин пишекрари чюлин аьзарханйириъ ва госпиталариъ эскрарин уьмрар бадали аьжалихъди женгнаъ учIвну, шаирари – чпин кьалмиинди душмандиз къаршувалиъ халкь рюгьламиш апIури, артистари – фронтдиъ айидарин гевюл цIиб вахтназкьан ачухъ апIуб метлеб ади, концертар гъахури… Гьаддиз думу Гъалибвал вари халкьдинуб гъабхьну, ва гъи думу ухьуз, думу дявдиъ наслариз, багьалу ирсси гъубзна. Гъит ухьу саб вахтнара абйирин ирс рабгърударикан вая зегьмет зяя апIрударикан даришри! Ихь халкьди улупу му зур гьунар аьсрариъра гъубзди – гъюру насларин рякъ ачухъ апIури ва дурарин юкIвар дамагъну ацIуз гъитри!

Аьхю Гъалибвалин йигъахъди учву тебрик апIурача, гьюрматлу газат урхурайидар.