Духтрин кесптIан важиблуб дюн’яйиъ адар гъапишра, йиз кучIал даршул. Инсандин сагъламвал уьбхбан цирклин гьарсаб пише гьюрматназ лайикь ву. Амма аьхю гьярфналан вуйи духтрин ччвур гъазанмиш апIайиз, инсанди урхбан шартIариъ аьгъювалар гъадагъбан ярхи рякъ ккадапIну ккунду.

 

 

Дугъриданра, медицинайин цирклиъ аьгъювалар гъадагъурайи студентариз уьмриъ хайлин читинвалар алахьуру. Духтирвалин ляхниъ асас шартI – медицинайихьна ккунивал ади хьувал ву. Медицинайин институтарин сабпи курсариъ урхурайи студентарин йигъ гвачIнин сяаьт урчIвубдиъ ккебгъуб хябяхъдин сяаьт хьубар-йирхьбариъ ккудубкIуру. Хъа хулаз гъафиганра, студентдихьан рягьятвал гъадабгъуз шулдар – закурин дарсариз гьязур шули, гизаф китабар дурхну ккунду. Юриствалин, экономикайин ва жара факультетариъ урхурайидари студентвалин уьмрикан тIяаьм ктабгъру вахтна, медицинайин вузарин студентариз китабарихьан аквнан уьлке рябкъюрдар.

Вушра, медик-студентарин саб буржи – лизи халатари-ккди дарсариъ дусувал – дурариз гизаф кьабул шлу ляхин ву. Сабпи курснаъ айидар, лизи халат алабхьну, аьхю аьшкьниинди кючейизра удучIвуру, ва кючейиъ айидарин фикирра дурари чпиина жалб апIуру. Хъа аьхю курсариз удучIвайиз, дурариз лизи халат думукьан ккунди гъубзудар.

Миржибпи мартдиз бахш дапIнайи газатдин нумра гьязур апIруган, ужуди урхурайи сар студент шуркан бикIувалра планламиш дапIнайча. Гьацдарикан сар ихь ватанагьли, Мягьячгъала шагьриан вуйи Сусанна Аьлибегова (шиклиъ) ву. Дугъу Мягьячгъала шагьрин медицинайинна биологияйин цирклиан артухъси аьгъювалар тувру 22-пи нумрайин лицейиъ урхури гъахьну. Гъубшу йисан Сусаннайи химияйиан 100 баллиз, биологияйиан – 89 баллиз ва урус чIалнаан – 98 баллиз ЕГЭ тувну, лицей ккудубкIну. ЕГЭ-йин му натижйириз лигну, Сусанна Дагъустандин гьюкуматдин медицинайин университетдиз кьабул гъапIну, ва шуру гьамусяаьт аьхю аьшкьниинди сабпи курснаъ урхура. Сусаннайихъди учу гъубху сюгьбат жикъиди исихъ чап апIурача.

– Медуниверситетдиъ урхуз читиндира ву, дурхну ккудубкIиган апIру ляхинра лап жавабдарвалинуб ву. Уву духтирвалин пише фици ктабгъунва?

– Йиз багахьлуйирин арайиъ духтрар гизаф а. БицIивахтнахъан мина гьадму кеспнакан гизаф ебхьури шуйзуз. Мектебдиъ ужуди дарсар урхруган, варидари узкан халис духтир хьиди кIури шуйи, гьаддиз узура духтирвалин кеспнакан фикир апIури гъахьунза. Духтирвал инсанарин арайиъ варитIан гьюрмат айи пише ву. Узу ужур духтир-хирург хьидиза кIури, кьаст дапIназа. ЮкIв хъади дарсарра урхураза. Алахьру читинваларин гъавриъра аза. Йиз гъард-шира гьаму университетдин 4-пи курснаъ урхура.

– Дагъустандин медуниверситетдикан гизаф ужудар дару мялуматар ерхьури шулу. Уву урхурайи вуздиъ мялимар студентарихьна фици янашмиш шула? Туврайи аьгъюваларикан рази вуна?

– Учуз дарсар киврайи мялимар студентарихьна лап ужуди янашмиш шула. Гьеле узуз сар мялимдин терефнаанра студентдин ихтиярар чIур апIбан дюшюшар дяркънадарзуз. Узухъди урхурайи студентарин десте мектебариъ ужуди урхури вердиш духьнайи, ЕГЭ-йиан ужудар баллар гъадагъну, конкурс-дин бинайиинди вуздиз кьабул дапIнайи жигьиларикан арайиз дуфнайиб ву. Коммерцияйин бинайиинди кьабул дапIнайи студентарра а, дурарикан гизафдари урхуз читинди вуйиваликан аьрзйир апIури шулу. Университетдиъ студентар, сабпи курснахъан хъюгъну, больницайихъди таниш апIуру. Практикайин вахтна аьзарлуйир кьабул апIбан ляхниин, рубар йивувалиин, капельница иливувалиин гюзчивал гъабхури шулча.

– Сусанна, яв фикриинди, духтрин ляхниъ варитIан харжиб фу ву?

– Йиз фикриинди, духтир аьзарлуйирихьна чан ляхнихьнаси янашмиш шули гъахьиш, му ужуб дару тереф ву. Духтри аьзарлуйин аьзаб чанубси кьабул апIуруш, думу ужур духтир ву. Духтрин юкIв дараскьалуб дубхьну ккундар. Аьзарлу духтрихьна чаз кюмек ккун апIури илтIикIуру. Жараси кюмек апIуз мумкинвал адарш, духтрин ушвниъ ширин чIал ади ккунду. Бязи вахтари ужуб гафнура сагъ апIуру. Ужуб, уччвуб гаф апIуз улупру дарсарра сабпи курснахъан мина кивуз хъюгъру.

Сусанна Аьлибеговайиз улубкьурайи дишагьлийирин машквар тебрик апIури, чан кIваъ айи метлебар кIулиз удучIвувал ккун апIурача. Гележегдиъ ужур духтир духьну, агьалйирин сагъламвалин гъуллугънаъ ишриву, Сусанна.