Мейлан Нежефов
Гьар йисан Урусатдиъ миллионариинди бицIидар хьадан садпи йигъаз ккилигури шулу. Думу йигъан ихь уьлкейиъ Варихалкьарин бицIидар уьрхбан йигъ къайд апIруганси, хьадан тятIиларра ккергъру.
1-пи июндиз Варихалкьарин бицIидар уьрхбан йигъ кIуру ччвур тувну ашра, думу йигъ социалист гьюкуматар вуди гъахьи Эстонияйиъ, Латвияйиъ, Болгарияйиъ, Вьетнамдиъ, Арменияйиъ, Китайдиъ ва гьацдар жара уьлкйириъ къайд апIура. Хъа Францияйиъ, Германияйиъ, Индияйиъ ва гь.ж. уьлкйириъ 20-пи ноябри Варидюн’яйин бицIидарин йигъ къайд апIуру.
БицIидар гьарган машквраз ккилигурайидар ву, гьаддиз фуну йигъан машквар къайд гъапIишра, дурарра, ухьура гизаф рази вухьа.
Гьелбетда, цци бицIидарин машквран йигъ республикайин вари шагьрариъ ва районариъ къайд гъапIну.
Садпи июндиъ Хив райондин РКДЦ-йин хуларин улихь бицIидарин йигъаз бахш дапIнайи шадлугънан серенжем кIули гъубшну. Думу ДГПУ-йин ректор Нариман Асваровдин, рягьимлувалин «Инсан» фонднан, «Ватан уьбхюрайидар» фонднан филиалин ва «Славица» ООО-йин кюмекниинди Хив райондин администрацияйи тешкил гъапIуб вуйи.
Культурайин центрин хуларин улихь серенжем ДГПУ-йин студентари ачмиш гъапIнийи. Дурари ДГПУ-йин ректор Нариман Асваровдин терефнаан бицIидариз хъадапIнайи тебрикнан кагъаз гъурхнийи ва чпихъди сатIиди бицIидариз гьамциб серенжем тешкил апIбаз райондин кIулиъ айи Ярмет Ярметовдиз чухсагъул мялум гъапIнийи.
Хив райондин главайин ва чан терефнаан райондин методический кабинетдин кIулиъ айи Тельман Агъабалаевди райондин бицIидар машкврахъди тебрик гъапIнийи ва «Йисандин тербиячи» конкурсдин муниципальный пайнан натижйир гъивнийи. Тербиячи бицIидарин кьюбпи дада гьисаб шула. Гизаф бицIидари, дадйирихъдитIан, чпин тербиячйирихъди артухъ вахт адапIура. БицIидарин йигъан тербиячивалин пишейин эйсйирин читин ва жавабдар зегьмет къайд апIуб чарасуз лазим ву. Конкурсдиъ гъалиб гъахьи АрхъитI гъулан бицIидарин «Улыбка» кIуру багъдин тербиячи Альбина Исмяиловайиз грамота ва пешкеш тувнийи. Гьацира пешкешариинди ва грамотйириинди бицIидарин багъарин тербиячйир Сабрина Наврузбегова («Солнышко»), Перизат Ремиханова («Ромашка»), Гюльмира Керимова («Ласточка») лишанлу гъапIнийи.
Серенжемдиъ МКУ-йин культурайин, спортдин, жигьиларин политикайин ва туризмдин отделин кIулиъ айи Казбек Къазиевра удучIвну гъулхнийи. Дугъу чан улхбаъ ДГПУ-йин ректор Нариман Асваровдиз гизаф йисари Хив райондин бицIидарин уьмриз асас фикир туврайивализ ва багъри райондин сабпи классдиз гъягърудариз кюмек тувбан ляхин аьдатнаъ ипнайивализ чухсагъул мялум гъапIнийи. Райондин культурайин кIулиъ айири бицIидарин багъариз пешкешарра тувнийи.
Хив райондин клиентвалин гъуллугънан кIулиъ айи Герман Асваровди бицIидариз шаду машквар тешкил гъапIу ДГПУ-йин студентариз чухсагъул гъапнийи ва хусуси метлеб айи дявдин операцияйин иштиракчйирин бицIидариз пешкешар тувнийи.
Рягьимлувалин «Инсан» фонднан ва «Ватан уьбхрудар» фонднан филиалин терефнаан имам Мансур Везировди ва филиалин координатор Имамудин Агъабаевди бицIидар машкврахъди тебрик гъапIнийи. Дурари хусуси метлеб айи дявдин операцияйиъ талаф гъахьи ва саб шил адарди дудургнайи иштиракчйирин бицIидариз пешкешар тувнийи.
Серенжемдиин муниципалитетдин бицIидарин багъариз гъягъюрайи баяр-шубари гъурху шиърари, гъапIу ялхъвнари, мяълийири артухъди мешреб алапIнийи.
