Наргиз Гюлечова
Республикайин хутIлариъ гъахурайи хьадукран ляхнар аьхирихъна гъюра.
Ккудубшу йисан чвлин вазари ццийин йисаз вуйи мягьсулар гъурзу хутIларин кьадар 86 агъзур гектар, вая 95% вуйи. Гьавйир дигиш хьувал себеб дубхьну, пландиъ улупнайи кьадар хутIлар урзуз хъуркьундар.
РД-йин гъулан мяишатдин ва ипIру-убхъру сурсатарин министрин сарпи заместитель Шарип Шариповди туву мялуматариинди, чвлин вазари мягьсулар гъурзу хутIларин гьял думукьан читинуб дар. Бегьер ужуб хьпан бадали, гьамусяаьт вари хутIлариз лазим вуйи хъайивалра апIура.
Хъа хьадукран вазари хутIлариъ урзурайи тумариканра улхури Ш. Шариповди мялум гъапIганси, цци республикайиъ хьадукран ляхнар 233,5 агъзур гектарин хутIлариъ гъухну. Улупнайи кьадарнакан 72,2 агъзур гектарин хутIлариъ тахилин ва харарин культурйир, 82,5 агъзур гектариъ майл-къарайиз ипIуз культурйир, саки 42 агъзур гектариъ мейвйир, 20,4 агъзур гектариъ картфар, 8,2 агъзур гектариъ бахчайин культурйир ва имбуну 7,3 гектариъ жюрбежюр жара культурйир дурзну ккудукIура.
«Гъийин йигъаз хутIлариъ гъахурайи ляхнар вари пландиинди кIули гъягъюра. 233,5 агъзур гектарин хутIларикан саки 210 агъзур гектарихьнакьан изан дапIну ккудубкIна ва гьадму кьадарнакан 155 агъзур гектаритIан артухъ хутIлариъ тумар дурзна», – гъапну министрин заместители, майдин аьхиримжи гьяфтайиз вуйи улупбарикан улхури.
Мидланра гъайри, республикайин саб жерге гъулан мяишатариъ алаф уч апIузра хъюгъна. Гъийин йигъаз айи мялуматариинди, 52 агъзуртIан артухъ алаф уч дапIна. Гьадму гьисабнаъди 51,5 агъзур тонна укI, 60 тонна сенаж ва 480 тонна силос.
ХутIларин ляхнарси, багъар кивубра республикайиъ йислан-йисаз улихь гъябгъюра.
Шарип Шариповди туву мялуматариинди, гьаму йисан 355-тIан артухъ гектариъ багъар итну. Гьадму гьисабнаъди 188 гектарин багъ СтIал Сулейман райондин «Полоса» ООО-йиъ ва 32 гектар багъ «Вита» ООО-йиъ, 5 гектар багъ Мягьярамкент райондин «Сапфир» ООО-йиъ ва гьацира 5,6 гектар багъ Дербент райондин Гьямзаевдин ччвурнахъ хъайи КФХ-йиъ итну.
