Гьюрматлу чвйир ва чйир! Магьа ухьуз, вари мусурман улматдиз, гирами Зул-гьиджа ваз дуфну хъубкьна. Думу дявйир гъахуз, гъалмагълар апIуз гъадагъа дапIнайи юкьюб вазликан сабунуб ву. Зул-гьиджа исламдин календариинди йисандин аьхиримжи ваз ву. Му вазлин варитIан важиблу мяна айиб гьадму вуки, мина Гирами Кьур`андиъ варитIан заанди дерккнайи ва гъибадатназра заан дережа айи вазлин эвелин йицIуд йигъ, гьадму гьисабнаан Аьрафайин (вазлин 9-пи), Гъурбан-байрам машквран (вазлин 10-пи) йигъар ва диндин мурхьларикан саб вуйи гьяж апIру вахт дахил шула. Му йигъар гьарсар мусурман касдиз асас вуйидар, ужувлан ляхнарихьна гьялак апIрудар, Аллагьу Тааьлайиина таваккул дубхну, ухьу дугъан амрар тамам апIуз чалишмиш шлудар ву. Му гирами йигъари ухькан гьарсар ужувлан ляхнарихьна, Аллагьу Тааьлайин разивалихьна артухъдиси чалишмиш духьну ккунду.

Аьхю машквар Ид аль-Адха, гъурбнар урккури, адру-дарудариз пай туври, багахьлуйирихьдира тIяаьм дадмиш апIуз гъитри, вари мусурмнар сатIи апIру, чиб-чпин арайиъ сабвал, гьякь-гьюрмат мюгькам апIру мубарак ляхнариз себеб шлу машквар ву. Гъурбнар апIуб шубуд йигъандин арайиъ давам шулу. Му гьяждиз душнайидарин апIру фарзар ва гьяждихъди аьлакьалу имбу ляхнар тамам дапIну ккудукIру вахтра ву. Мидихъди сабси Ид аль-Адха ихь терефнаан Аллагьу Тааьлайиз артухъди гьямд апIуз, марцци ибадат апIуз хъанара артухъди гьевесламиш апIурайи машквар ву.

Гирами ватанагьлийир! «Табасарандин нурар» газатдин редакцияйин терефнаан ичв Гъурбан-байрам машквар мубарак апIурача! Гъит гьарсар касдин гъапIу ужувлан ляхнар, гъахи гъурбнар, туву садакьйир, гьяждиз душнайидарин чпин гьяж ва варидарин марцци ниятар Аллагьу Тааьлайи заан дережайиинди кьабул апIри! Гъит ихь уьлкейин айитI ва чIатан душмнар амдарди, дявйирра ккудукIну, дюн`яйиъ ихь аку гележегдиз ислягьвал кьисмат ибшри!