Зубайдат Шябанова

Улихьна йигъари Мягьячгъала шагьриъ Анатолий Карповдин ччвурнахъ хъайи республикайин шахматарин клубдиъ урус шашкйириан Дагъустандин чемпионат кIули гъубшну. Душваъ республикайин варитIан бажаранлу 30 шашкйир уйнамиш апIру устадар иштирак гъахьну.

 

Табасаран райондихъанди думу талитариз Урусатдин спортдин устад Исмяил Исмяилов, Гъазиаьгьмад Ханялиев ва Мягьямед Гьясанбегов гъушну.
Турнир швейцарский къайдайиинди кIули гъубхну.

УрчIвуб турин вахтна гъазанмиш апIуз мумкинвал айи 9 баликан талитариъ варитIан заан балл (7,5 очко) Исмяил Исмяиловди гъазанмиш гъапIну. Талитариъ думу Дагъустандин аьхиримжи йисарин шубур чемпиондин – Мягьячгъалайиан вуйи Шамиль Аьлиевдин, Къарабудагъкент райондиан вуйи Мустафа Мягьямедовдин ва Хасавюртдиан вуйи Салман Юнусовдин – улихь гьудучIвну. Дугъан улупбарихъ сарихьанра хъуркьуз гъабхьундар.
Гьаци, Исмяил Исмяилов урус шашкйириан хьубпи ражари республикайин чемпион гъахьну. Къайд дапIну ккундуки, гъийин йигъаз республикайин шашкйир уйнамиш апIрударин арайиъ дагъустан талитариъ мукьан ражари чемпион сарра гъахьундар.
Кьюбпи йишв’ина 7 очко гъазанмиш гъапIу Мягьячгъалайиан вуйи Мягьямедрасул Зулпикьаров удучIвну. Хъа шубубпи йи-шван сагьиб 6,5 очко гъадабгъу, Кизилюртдиан вуйи живан Амир Аьбдулягьидов гъахьну.

2025-пи йисандин республикайин турнирин натижйириинди, Дагъустандин сборный команда гьязур гъапIну. Дидиз дахил гъахьи спортсменар багарихьди Волгоградский областдин Волжский шагьриъ гъягъру ЮФО-йин ва СКФО-йин чемпионатдиз гьязур шула. Дагъустандин командайин дахилназ Табасаран райондин шубур вакил гъадагъну – Исмяил Исмяилов ва дугъан ученикар Мягьямед Гьясанбегов ва Альфия Ражабова.
Ихь бажаранлу спортсменариз хъуркьувалар ва хъана заан гъалибвалар ккун апIурхьа.