Умгьанат Сулейманова

Шиърар яратмиш апIуз варидарихьан шлуб дар. Поэзияйин халис эсерар дикIбан бадали, ужуб гьевес кади, дериндиан чIал аьгъяди ккунду. Табасаран литературайиъ адлу шаирар хайлин а, гьадрарикан сар Гюлбика Уьмарова ву.

Цци табасаран шаир Гюлбика Уьмаровайин «ЧIал агъюдарин сабвал» ччвур тувнайи нубатнан китаб чапдиан удучIвну.
16-пи майди Дербент шагьрин 8-пи мектебдиъ, думу мектебдин директор Радик Рамазанов кIули ади табасаран чIалнан мялимарихъди, хъа 29-пи майди Мягьячгъалайиъ ДГУ-йин бабан чIаларин центрийиъ Марина Гьясановайин регьберваликкди, ихь интеллигенцияйихъди, студентарихъди гьаму китабдин презентацияйиз бахш дапIнайи литературайин мяракйир кIули гъушну.
Гьелбетда, му авторин сабпи китаб дар. Дидиъ жюрбежюр темйириан вуйи шиърар тувна. Дурар урхрудариз гизаф кьабул хьиди, гьаз гъапиш Гюльбика Уьмаровайи дидикIнайи юкьюб цIарнан бендариъ инсанарин сар-сарихьна вуйи янашмиш’валикан дупна; автори инсанариз жилиин ислягьвал ва бабан чIал уьбхюз дих апIура. Йиз гафариз кюмек вуди «ЧIал агъюдарин сабвал» китабдиан вуйи юкьуб цIарнан саб шиир исихъ тувраза:

ЙикIайизкьан чIал ккундузуз гирами,
ЧIал ккундайиш, узу шиърар дикIуйин?
Ккунир вуза чIал аьгъю гьарсар адми!
ЧIал аьгъдайиш, аку уьмриъ гьапIуйи?

Китаб ужуди гьязур дапIнайиб, урхуз юкIв шлуб ву.
Гюлбика Уьмарова Гъвандикк гъулаъ аьхю хизандиъ 1960-пи йисан 6- пи июндиъ Пушкин дюн’яйиина гъафи йигъан бабкан гъахьну. Ихь дишагьлийирикан сарпир вуди Москвайиъ Литературайин институт ккудубкIур, 30-тIан артухъ китабар гъидикIур, А.С. Пушкиндин «Евгений Онегин», Р. Гьямзатовдин «Йиз Дагъустан», Л. Кероллин «Алиса аьламатнан вилаятдиъ», Сент-Экзюперийин «БицIи паччагь» ва хайлин урус классикайин жара авторарин эсерар ихь чIалназ илтIикIур Гюлбика Уьмарова ву.
Шаириз кIван шадвал ва аьхир адру гьевес ккун апIури, марцци кIваан дугъан 65 йис ва нубатнан китаб редакцияйин ва газат урхурайидарин терефнаан мубарак апIурача!