Мейлан Нежефов
Гъубшу гьяфтайин аьхириъ Хив райондин администрацияйиъ райондин кIулиъ айи Ярмет Ярметовдин жягьтлуваликкди террориствализ аькси комиссияйин заседание кIули гъубшну.
Заседаниейин ляхниъ РД-йин ватандаш оборонайин, чарасуз гьялнан ва табиаьтдин хатIа-балйири гъахи зарарар терг апIбан ляхнариз лигру министр Нариман Къазимягьямадов иштирак гъахьнийи.
Заседание ачмиш гъапIу Ярмет Ярметовди Нариман Къазимягьямадов дугъаз улихьнаси туву гьюкуматдин заан наградайихъди – Александр Невскийин ордендихъди – тебрик гъапIну ва дугъу Хив райондиз апIурайи кюмекназ чухсагъул гъапну.
Заседаниейиз 2024-2028-пи йисари РФ-дин терроризмдин идеологияйиз аьксивал улупбан сатIи вуйи пландиъ улупнайи серенжемар Хив райондин ругариин уьмриз кечирмиш апIбан, райондин бязи объектар – образованиейин, культурайин ва диндин идарйир, инсанар гизаф уч шлу йишвар – террориствалин алжагъбарихьан уьрхбан ляхнин месэлйир адагънайи.
Мидланра савайи, НАК-дин, РД-йин АТК-йин, Хив райондин АТК-йин къарарар тамам апIури, Сирияйиъ ва Иракдиъ дявдин женгар гъягъюрайи йишвариан кьяляхъ духнайи бицIидар жвуван ватандихъди, ислягь уьмрихъди вердиш апIбан ляхнин натижйирикан гъулхнийи.
Гъуху серенжемарикан мялуматар туври, Хив райондин образованиейин отделин директорин заместитель Азадин Юсуфов, райондин культурайин, спортдин, жигьиларин политикайин ва туризмдин отделин кIули айи Казбек Къазиев райондин мялуматарин гъуллугънан центрин директор Руслан Аьшурбегов удучIвну гъулхнийи.
Дурари образованиейин ва культурайин идарйириъ гъуху профилактикайин серенжемарикан, терроризмдин идеология тарабгъбаз, Хив райондин ругариин экстремиствалин жергйириз жигьилар жалб дарапIбаз аьксивал улупури, мялуматарин дакьатариъ гъабхурайи ляхникан, агьалйирин арайиъ, гизафси жигьиларихъди ватанпервервалин сюгьбатар гъахури, терроризм деврин тIягъюн вуйивалин гъаврикк ккаъри, дубхнайи ляхникан ктибтнийи.
Заседаниейиъ гьял гъапIу месэлйирихъди сабси, Нариман Къазимягьямадовди гьацира мектебариъ линейкйир гъахруган Урусатдин гимн урхуз гъитувалин мянайиканра гъапнийи, фицики думу жигьилариз ватанпервервалин тербия тувбан важиблу пай ву.
«Жигьиларин арайиъ хьуб ва дурарин яшайишдин месэлйириз фикир тувуб, гизаф миллетарикан ибарат вуйи республикайиъ политикайин мюгькамвал гъидритуб чарасуз ву. Тербияйин ляхниина райондин машгьур касар, спортсменар, хусуси метлеб айи дявдин операцияйин игитар, генералар жалб апIуб, мялуматарин дакьатариъ террориз аькси ляхин гъабхуб лазим ву», – гъапну Нариман Къазимягьамедовди.
Генерал-майори къайд гъапIганси, образованиейин идарйирин, диндин дараматарин хатIасузвал тямин апIуб ихь варидарин улихь дийибгънайи месэла ву, хъа терроризмдиз ва экстремизмдиз аьксивал улупбаъ мялуматарин дакьатари лайикьлу йишв дибисна.
