Наргиз Гюлечова
Хьадну, чпин отпускдин вахтна, Урусатдин регионариан Дагъустандиз рягьятвал гъадабгъуз гъюрайи хяларин кьадар аьхиримжи йисари артухътIан артухъ шула. Сач региондиз саки 2 миллиондихьнакьан туристар гъафну. Хъа гьамусяаьт дурарин кьадар 3 миллиондихьна за хьуз мумкин ву, гьаз гъапиш регионариан гизафси туристар гъягъюрайи Сочийин гьюлин гъирагъарихъ цци туристар кьабул апIуз шуладар. КIваин апIурхьа, сач декабрин вазли 9,2 агъзур тоннайин мазут гъабхурайи гимйир ккадакну, вари мазут гьюлиина удубзну, гьюлин гъирагъарра мазутди ккаъну. Натижайиъ пляжарин гъирагъар марцц апIуз даршули, читин гьял арайиз дуфна. Гьаддиз Урусатдин регионариан вуйи туристари чпин отпуск Дагъустандиъ гьапIуз планламиш дапlна.
Гьар йисан ихь республикайиъ тялукь гъуллугъари, хьадан фасил ккебгъайиз, янаки гьюлерихъ жикIру вахт улубкьайиз улихьна гьязурлугвалин ляхнар гъахури, штун марццишинра ахтармиш апIури шулу. Ццийин хьадан вазари Каспий шагьрин гъирагъарихъ хъайи вари пляжариъ Роспотребнадзори гьюлик кахъну жикIуз гъадагъа апIура. Мидин гьякьнаан республикайиъ айи Роспотребнадзорин управлениейиан хабар тувра. Ккудубшу йисанра саки вари пляжар гьюлин шид кьалуб вуйивализ лигну, хъяркьнийи. Вушра, жикIурайи касарин кьадар кам гъабхьундайи… Хъа цци саспи пляжар ачмиш гъапIну.
«Ццийин июндин эвелариз вуйи улупбариинди, Роспотребнадзориз Каспий гьюлин гъирагъдихъ хъайи 11 пляжарин эйсйирихьан, агьалйириз жикIуз ихтияр тувбан аьрзйир гъафну. Гьадрарикан анжагъ шубубтIан тамам дапIнадар. Гьаддиз, цци Избербаш шагьрин, Гъяякент ва Къарабудагъкент районарин гъирагъарихъ хайи пляжарихътIан жикIуз ихтияр адар. Хъа Мягьячгъалайиъна Каспийскдиъ айи пляжарихъ жикIуз гъадагъа дапIна. Гьяйифки, ихь гьюлиз гизаф кьалу штар деетура. ЖикIуз ихтияр туври адрувалра гьамдихъди аьлакьалу ву. Мициб аьгьвалат му шагьрариъ ади, сад ва кьюд йис дар», – кIура Роспотребнадзорин управлениейин вакили.
ЖикIуз ихтияр тувну адру пляжарин эйсйири, гъюлихъна жикIуз гъюрайи касар жюрбежюр уьзрарихьан уьрхбан ва дурар гъаврикк ккаъбан бадали, лазим вуйи серенжемар гъахуб чарасуз ву, гьадму гьисабнаан варидариз рякъруганси, «Пляждихъ жикIуз ихтияр адар» кIуру мялуматар кирхну ккунду.
Роспотребназдорин управлениейи гъюлихъна жикIуз гъягъюрайи касарикан, пляжарихъ кирхнайи лишнариз, мялуматариз фикир тувуб ккун апIура, фицики гьюл кьалуб вуйивализ лигну, жюрбежюр уьзрар арайиз гъюб мумкин ву.
