Наргиз Гюлечова
Гьаму йигъари республикайиъ газракан зегьерлу хьувалин ва хуларик цIа кабхъувалин дюшюшар арайиз гъафну. Гьаци, Гергебил райондин Аймаки кIуру гъулаъ хусуси хулариъ яшамиш шулайи 3 кас, гьадму гьисабнаъди сар яшар бегьем дархьи бицIир, угарный газракан зегьерлу гъахьну. Натижайиъ, аьхюдарикан сар, яманди аьзият дубхьну, дишлади кечмиш гъахьну, хъа имбудар райондин больницайиз гъухну.

Сабсана гьациб пис дюшюш Буйнагъск райондин Асккан Женгутай кIуру гъулаъ гъабхьну. Душваъ, турбайиан удубчIвурайи, уч дубхьнайи газ дутIубкIну, цIа кабхъувал арайиз гъафну. Натижайиъ сар дишагьлина дугъан 4 велед яманди дургну, Республикайин цIи гъургдар сагъ апIру центриз гъухну. Гьяйифки, бицIидарикан кьюр сагъ апIуз гъабхьундар, дурар гъийихну. Кьюбрид дюшюшариъра сагъламвализ зарар гъабхьи касариз духтрари кюмек апIура.
Гьаму пашманвалин дюшюшарихъди аьлакьалу вуди, республикайин главайи зарар гъабхьи хизанариз башсагълугъвал ва, инсанарихьна илтIикIну, дурариз кюмек апIуб ккун гъапIну.

«Фикир вуйиз, гьадму хулариз дизигнайи газ къанунсузди дизигнайиб ву. Эгер хатIасузвал уьбхбан вари тIалабар дюрхну айиш, гьамцдар пашманвалин дюшюшар арайиз гъидайи. Къанунсузди газ зигувалин, сертификация адру алатар ишлетмиш апIувалин ва пишекрарин ерина шлихь-вушра газ зигуз гъитувалин натижа магьа гьамциб шула», – аьлава гъапIну Сергей Меликовди.
Гьюрматлу газат урхурайидар! Жвув ва жвуван хизан уьбхбаъ гьарсар кас ихтият духьну ккунду. Гьаддиз къанунсуз ляхнар апIуз чалишмиш махьанай.