Гюльнара Мягьямедова
25-пи июнди лисхъан сяаьт кьюбди Табасаран райондин кIулиъ айи Мягьямед Къурбановди Дагъустандин ЦУР-иъ муниципалитетдин агьалйирин суалариз жаваб туври, райондин артмиш’валин важиблу месэлйирикан гъулхну.
Къайд апIуб лазим вуки, Табасаран райондин агьалйириз сабпи йишв’ин рякъярин месэла дийибгъна. Райондин кIулиъ айири гъапиганси, вари рякъяр сабишв’инди апIуз шлудар дар.
Райондин гизаф гъуларин агьалйири чпин хусуси жягьтлувалиинди, жиларин месэлйириз лигру пишекрарин ихтияр адарди, хулар тикмиш апIура. Хулар тикмиш гъапIган, дина газ, электричество зигбан месэлйир арайиз гъюра. Мягьямед Къурбановди гьадму месэлайин гьякьнаанра агьалйир гъаврикк ккаънийи.
Гизаф суалар райондиъ айи табиаьтдин ядигар – Хянгъярин рибчрарикан вуйи. Ерли агьалйири рибчрарихъна лигуз гъюрударихьан гьякъи бисувалин гьякьнаан фициб къарар кьабул дапIнаш, суалар тувнийи. Мягьямед Къурбановди гъапиганси, гьелелиг думу месэла гьял дапIну ккудубкIну адар. Республикайин жара йишвариъра табиаьтдин ядигарар а. Дицисдар йишвар РД-йин табиаьтдин ва экологияйин министерствойин ихтиярнаъ а. «Табасаран халкь варитIан ужуди хялар кьабул апIуз аьгъю халкь ву. Узуз рибчрарихьна вуйи рякъ хъябкьюз затра ккундарзуз. Думу ляхин райондин администрацияйин къарарнакан асиллура дар», – гъапнийи Мягьямед Къурбановди.
Райондин агьалйири гъулариан хъархъвас адабгъбан суаларра гъитIирккнийи. Муниципалитетдин кIулиъ айири хъархъвас адабгъбан вазифйир региондин операториз табшурмиш дапIнайиваликан гъапнийи. Региондин оператори гъулариъ хъархъвас абхьру контейнерар дивру йишвар гьязур апIуб тIалаб дапIнайи. «Площадкйир гьязур дапIна, контейнерар дивна, агьалйири чIюрхяр контейнерариз уч дапIну ккунду. Хъархъвас гъабхру машин гъулаз гьапIуб, гъул’ан хъархъвас адабгъуб операторин вазифа ву», – жаваб тувнийи муниципалитетдин кIулиъ айири.
Гъулариъ мектебар, ФАП-ар, культурайин хулар тикмиш апIбакан вуйи суаларра хъадаънайи. «2019-пи йисан райондиъ йирси духьну ахьрайи 12 мектеб айи. Гъубшу йисан Туриф ва НичIрас гъулариъ цIийи мектебар ляхник кирчну. Хюрикк гъулаъ аьхю мектеб тикмиш дапIну ккудубкIура.
Гали-Гюгьрягъ, Жулжагъ, СертIил цIийи мектебар тикмиш апIуз вари документар гьязур дапIна. Хусуси метлеб айи дявдин операция гъябгъюрайивализ дилигну, вари ляхнар планламиш дапIнайиси кIулиз адагъуз шуладар. Хъа тамам дапIнайи ляхнарикан улхуруш, аьхиримжи йисари райондиъ «100 мектеб» программайиинди 36 мектеб, федеральный программайиинди 12 мектеб кIан’ан кIулиз рас дапIна», – гъапнийи Мягьямед Къурбановди.
Райондин гъулариъ 12 ФАП дивна, гьаму йисан Рушв’ил ва Лижваъ цIийи ФАП-ари ляхин апIуз хъюгъна.
Аьхиримжи йисари райондиъ культурайин идарйирра цIийи алаура. Гъюру 3 йисандин арайиъ Къужникк ва Гьесихъ гъулариъ культурайин хулар тикмиш апIуб планламиш дапIна.
Эфирихъ хъпехъурайидари гъулар марцци штухъди тямин апIбан месэлара фикир тутрувди гъибтундайи. Муниципалитетдин кIулиъ айирин гафариинди, Халагъ, Гуми, Бухьнагъ гъулариз шид зигбан бадали, 99 миллион манат жара дапIна, документарра гьязур дапIну, подрядчикра кадагъна, гъюру йисан думу гъуларизра шид зигиди.
Къужникк-Хючна штун турба зигбан ляхнарин кьюбпи пайнакан вуйи суаларра яваш шуладар. Райондин главайи гъапиганси, кьюб нирин кьялаъ айи Хючна гъул марцци штухъди тямин дапIну адрували агьалйириз гизаф гъулайсузвалар арайиз хура. «Думу месэлара гъюру йисан октябрин вазлиз гьял хьибди. Республикайин кIулиъ айирин кюмекниинди 175 миллион манат жара дапIна, вари ляхнар тикилишчивалин министерствойихьна тувна, подрядчикра улупна», – гъапнийи Мягьямед Къурбановди.
