Гюльнара Мягьямедова

24–пи июнди РД-йин Главайин багахь хьайи илимдин, техникайин, литературайин, публицистикайин, искусствойин ва архитектурайин цирклиъ Дагъустан Республикайин Гьюкуматдин премийириз лигру комиссияйин натижйир йивру заседание кIули гъубшну.

 

Заседаниейиз гьял апIбан бадали саб месэла адабгънайи – комиссияйи кьабул дапIнайи ляхнарихъан сесер тувуб.
РД-йин Гьюкуматдин 10 премия бадали, комиссияйи 42 ляхин кьабул дапIнайи.
ВаритIан аьхю талит табии, жямяаьтлугъ илмарин ва техникайин цирклиъ дубхьнайи – 4 премия бадали 19 ляхин талитназ адагънийи.

Литературайин цирклиъ улупнайи 2 премияйиз – 12 ляхин, чап апIбарин цирклиан вуйи саб премияйиз – 5 ляхин, театрин искусствойин ва кинойин цирклиан вуйи саб премияйиз – 2 ляхин, шиклар зигбан искусствойин ва архитектурайин, тикилишчивалин цирклиан вуйи саб премияйиз – 3 ляхин кьабул дапIнайи. Музыкайин, концертарин, хореографияйин цирклиз жара дапIнайи саб премияйиз – 1 ляхинтIан кьабул дапIнадайи.

Мидланра савайи, кьюр касди Расул Гьямзатовдин ччвурнахъ хъайи, 5 касди СтIал Сулеймандин ччвурнахъ хъайи премия бадали чпин ляхнар комиссияйиз тувнайи. Думу номинацйириъ кьюр лауреат ктагъну.
Кьабул гъапIу ляхнариин, дурар ахтармиш апIури, зегьмет гъизигу касарикан ибарат вуйи секцйир арайиз гъахнийи. Гьар секцияйи чпин гъалибчи улупну, натижйир йивру заседаниейиз варитIан лайикьлу авторарин ляхнар адагънийи. Жиниди сесер тувбан натижйириинди Комиссияйи РД-йин Гьюкуматдин премия тувбан теклифар, аьхиримжи къарар кьабул апIбан бадали, региондин кIулиъ айирихьна хътаъну.
Премияйиз лайикь гъахьидарикан мялумат гъюру нумрайиъ тувдича. Улихь ккимиди вуйи мялуматариинди, гъалибчйирин арайиъ ихь ватанагьлийирра а.