Мейлан Нежефов

Шиклиъ газат урхурайириз рякъюрайидар Хив райондин Асккан Яракк гъулан агьалйир ву. Дурари чпин гъулан ругариин али «ЧIурдин гъярин шид» кIуру булагъ Ярккан Хючназди гъябгъру рякъюхъна хура. Булгъиз цIийи уьмур туври, 1 км манзилнаъди шид зигурайи баярин улихь хьайи гъулан имам Гьяжириза Кьулиевди узуз мидкан хабар тувнийи.

«Йиз вазифа гъулан жямяаьтлугъ ляхнарин гъайгъушнаъ хьуб ву. Хъа жямяаьтра жвувахъди юла гъябгъюри, гъул бадали юкIв убгури, шли пулин дакьатариинди, шли ужуб гафниинди, хъа шли апIурайи ляхниз кьувватнан кюмек туври ликар алдагъруси гъабхьиш, дугъриданра, фу вушра саб хайирлуб арайиз хуз гъулайди шулу. Магьа гьацдар касарикан Закир Керимов, Эседуллагь Мисриханов, хусуси метлеб айи дявдин операцияйин иштиракчи Аьбдулгъафар Кьулиев гъардшар вуйи Эльгьан ва Эльшан Сяидмягьямадовар кIулиъ ади, ният дапIнайи гьаму ляхин аьхирихъна хурача. Аферин баяриз. Мицдар сувабнан ва жямяаьтлугъ ляхнариз бакар шлу касар ихь арайиъ артухъ ишри. Хъа рякъ-хулиъ айидариз булагъдин шидкан дарман ибшри», – гъапнийи гъулан главайи.