Наргиз Гюлечова
27-пи июнди Вариурусатдин ляхин абгбан «Урусатдин ляхин. Мумкинваларин вахт» ярмаркайин федеральный пай кIули гъябгъиди.
Къайд дапIну ккундуки, му ярмарка гьар йисан тешкил апIурайиб ву. Республикайи зегьметнанна яшайишдин артмиш’валин министерствойин мялуматариинди, апрелин вазли региондин дережайиъди кIули гъубшу серенжемдин кюмекниинди, 800 кас ляхнихъди тямин гъапIну. Му ражари кIули гъябгъру ярмаркайин асас майдан Мягьячгъалайин Дуствалин хал ву. Ярмарка гьацира республикайин имбуну муниципалитетариъ айи ляхнихъди тямин апIру 46 центрариъра гъябгъиди.
25-пи июнди Дагъустандин РИА-йин конференцйир гъахру залиъ ярмаркайиз бахш вуйи пресс-конференция, кIули гъубшну. Серенжемдиъ РД-йин зегьметнна яшайишдин артмиш’валин министерствойин ва «Зеленое яблоко» компанияйин вакилар иштирак духьнайи.
РД-йин зегьметнаан яшайишдин армиш’валин министерствойин ляхин абгурайидарихъди ва ляхин туврайидарихъди сатIиди ляхин апIру отделин начальник Мажид Аьлиевди къайд гъапIганси, гьамусяаьт республикайиъ 300 агъзурихьна инсанариз, ляхин апIуз ккундуш, йишвар а. ВаритIан асас вуди гьуркIри адру пишекрар духтрар, мялимар, бицIидарин багъариъ ляхин апIру тербиячйир, инжинерар, станкарихъ лихрудар ва гь.ж.
«Пуз ккундузузки, ярмаркайиз ляхин абгури гъюрайи, хусуси метлеб айи дявдин операцияйиъ иштирак шулайидарин хизанариз асас фикир тувди. Ич терефнаан сабпи нубатнаъди дицдар хизанариз ляхин абгбаъ кюмек апIуз гьязур вуча», – гъапну Мажид Аьлиевди.
Мягьячгъала шагьрин кадрйирин центрин кIулиъ айи Мягьямадрасул Мягьямадовди мялум гъапIганси, ярмарка гъябгъюрайи йигъан Дуствалин хулан 1-пи мертебайиъ хусуси метлеб айи дявдин операцияйин иштиракчйириз вуйи центрра гьязур апIиди. Центрин вакилари ва волонтерари, ляхин абгурайи СВО-йин иштиракчйирин жандин сагъламвализ дилигну, дурариз хас шлу ляхин абгиди.
Республикайин пайси дарди, ярмаркайин федеральный пай лап яркьуди гъябгъиди. Мушваъ аьдати жюрейииндиси, онлайн жюрейииндира ляхин абгуз мумкинвал а. Му ражари дагъустанлуйириз Ленинградский, Ульяновский, Ростовский областариъ ва гьацира Урусатдин цIийи регионариъра ляхин абгуз мумкинвал хьибди. Эгер учву ляхин абгураш, ярмаркайиъ иштирак йихьай.
