Гюльнара Мягьямедова
Гъубшу жвуми йигъан Мягьячгъала штухъди тямин апIурайи гъанавдизди чиркин шид гъюрайиваликан хабар гъабхьиган, шагьрин Ленинский райондиъ яшамиш шулайи агьалйириз шид туврайи Хушетдин шид уьбхюрайи дагар хъябкьнийи. Вахт ккимиди мялумат тутрувди шид хъябкьиган, гьаму хьадан мани йигъан шагьрин агьалйир шид адарди гъузну.
Пуз ккундузузки, вари шагьриз сад йигъанна йишван шид адарди гъузубтIан, сар кас аьзарлу хьуб гъагъи ляхин ву. Улихьнаси Мягьярамкент райондиъ, рудрарин инфекция кайи шид дубхъну, 450 кас аьзарлу гъахьнийи. Думу кьадарнакан 422 кас бицIидар вуйи. Дидин гьякьнаан 14-пи июли республикайин сагъламвалин министерствойи мялумат тувну. Шид чиркин апIбан тахсиркрарра инсанар ву.
Роспотребнадзориан туву мялуматариинди, Мягьярамкент райондиъ агьалйири убхъурайи шид марцц дарапIди туврайиб вуди гъабхьну, мидланна савайи, «Жепельский» булагъдиан Гильяр гъулаз вуйи штун рякъюъ аварияра дубхьнади гъабхьну. Деетнайи хайлин къайдасузваларихъди сабси, шид гъюрайи турбйир ккивнайи йишв’ин хуларра дапIна.
Гизаф инсанар аьзарлу хьпахъди аьлакьалуди республикайин силисчивалин органари уголовный дело гъитIибккну. Ляхнихьна жавабдарвал адарди янашмиш хьпаз дилигну, Мягьярамкент райондин яшайишдинна коммуналин мяишатдин муниципальный идарайин директор гъидисну.
Гьамцдар дюшюшар арайиз гъювали гъуллугъариъ айи инсанарин жвуван ляхнихьна жавабдарвал адруб улупура.
Дагъустандин гьюкмари Мягьярамкент райондиъ гизаф инсанар рудрарин инфекцияйиан аьзарлу хьпан кьяляхъ муниципалитетдин хьуб гъулаъ шид гъюрайи турбйир гьюдюхюб планламиш гъапIну. Гьамциб саб бала дархьиди, вахтниинди къайдасузвалар арайиан адагъуз шулдарин?!
Гьаму дюшюшдин кьяляхъ штун марццишнахъан жавабдарвал гъабхурайи идарйирира штун ахтармишар гъахуз хъюгъна. Бактерйири ва вирусари чиркин дапIнайи шту рудрарин уьзрар, гепатит, холера арайиз хуз мумкин ву. Варидюн’яйин сагъламвалин тешкилатдин улупбариинди, марцци дару шид ишлетмиш апIбу 90 % уьзрар арайиз хуру.
Лап багарихьди Мягьячгъалайиъ Октябрин инкьилабдин ччвурнахъ хъайи гъанав марцц апIру субботник гъабхиди. Дидин гьякьнаан ЖКХ-йин ва рекламайин ляхнин месэлйириз бахш дапIнайи совещаниейиъ РД-йин Правительствойин председатель Аьбдулмуслим Аьбдулмуслимовди мялумат тувну.
Региондин премьер-министри Мягьячгъалайин администрацияйиз «Дагмелиоводхоз» ФГБУ-йин идарайихъди ва жара жавабдар гъуллугъарихъди сабси субботник фила гъабхуруш, вахт дивуб ккун гъапIну. «Гъанав марцц апIруган, агьалйир штухъ мягьрум дапIну гъитну ккундар. КОР ухьу штухъди тямин апIурайи асас йишв ву, агьалйирин сагъламвал душваъди гъюрайи штун марццивалилан асиллу ву. ВаритIан читин йишвар аьгъю апIинай, субботник гъабхру йигъ мялум апIурхьа», – гъапну Аьбдулмуслимовди.
Жилиин шид адарди гъабхьиш, вари чIивиб: инсанар, нахшрар, набататар – йихуру. Шид нафттIан, газтIан, рукьтIан, гакIултан лазим шлуб ву. Гьаддиз ихь штун марццишин уьбхюрхьа, шид Урусатдиъ гизаф ашра, думу кьяняаьтлуди ишлетмиш апIурхьа. Эгер штун марццивалиин учву умудлу дарш, дурубхьу шид мубхъанай!
