Гюльнара Мягьямедова

Дагъустан чан дагълариинди, Каспий гьюлиинди, тарихи йишвариинди туристариз машгьур йишв дубхьна. Дупну ккундуки, гьеле ихь региондиъ туристариз кьабул шлу вари шартIар арайиз духнадар. Гьаддиз республикайин гьюкмари айи мумкинвалар шлукьан гизаф ишлетмиш апIура.

 

Дагъустан Республикайин туризмдин министерствойиъ, региондиъ туриствал артмиш апIбан бадали, субсидйир жара апIбан конкурсдин натижйир гъивну.
Министерствойиан туврайи мялуматариинди, региондин бюджетдиан туриствалин инфраструктурайиз жара дапIнайи пулин уьмуми кьадар 60 миллион ву. Конкурсдин натижайиъ районариъ гьамцдар ляхнар гъахиди:
Ахцигь райондиъ Ахцигь гъулан йирси пайнан кючйирикк гъван ккабхьди.

СтIал Сулейман райондиъ Орта СтIал гъулаъ ягъли йишв’ин табиаьтдиз тамаша апIру майдан ккабалгиди.
Табасаран райондин тарихдинна ватан аьгъю апIбан музей (шиклиъ) рас апIиди.
Гуниб райондиъ гъалайин цалихъди инсанар яягъди гъягъру жилгъа рас апIиди.

УнцIукул райондиъ Ирганай гъулаз гъюру машиндин рякъ ва машинар дерккру йишв арайиз хибди.
Мягьячгъалайиъ бицIи автобусар дерккру йишвра хъади туристариз вуйи мялуматарин центр тешкил апIбанди ву.
Вари дюн’яйиз машгьур вуйи Сулакдин дараскьал нирхьан ярхла дарди, Салатауйин хьарарин (пещерный) гъурулушдин багахь сабсана отель, кофейня ва алвер гъабхру бицIи туканар тикмиш дапIну ккудукIна.
Гьацира министерствойиан туврайи мялуматариинди, Кьибла Дагъустандиъ туристариз цIийи маршрутар ккабалгура. Думу маршрутарикан саб Ахцигь райондин ягъал дагълариъ айи Ухул гъулаз ву. Кьюбпи маршрутра дагъдин ямаждик цемент ишлетмиш дарапIди, архитектурайин аьдати жюрейиинди тикмиш дапIнайи хулар айи лезгйирин Чепер гъулаз ву.